ÁCh-2014: Ispanııa nege jeńildi?
Ispanııaǵa ne boldy?
Bul suraq qazir barlyq jankúıerlerdi mazalap júrgeni anyq. Quramy jaǵynan osal tusy kórinbeıdi, ár shepte saıdyń tasyndaı iriktelgen, eń tańdaýly fýtbolshylar jınalǵan. Bul oıynshylar jeńbegen jarys, baǵyndyrmaǵan qamal qalmady. Biraq Vısente Del Boske olardyń qartaıǵanyn eskermegen sekildi. Kasılıas, Havı, Inesta, Vılıa, Torres orda buzar shaqtan asyp barady. Del Boskege múmkin jas tolqynǵa senim artqany jón bolar ma edi?.. Taǵy bir sebep - ıspanııalyqtar fýtbol maýsymynan keıin aıyǵa almady. Esterińizde bolsa, Chempıondar lıgasynyń fınalynda Ispanııanyń qos komandasy ózara myqtyny anyqtaǵan edi. Jurttyń bári Mýndıalǵa daıyndalyp jatqanda bul fýtbolshylar eýromaýsymdy sátti aıaqtaýǵa baryn salyp ter tógip jatty. Úshinshi sebep - Barselonadaǵy oıyn daǵdarysy. Bıylǵy maýsymda katalondyqtardy synǵa almaǵan maman bolmady desek artyq aıtqandyq bolmas. Al Ispanııa quramasy men Barselonanyń negizin bir oıynshalar quraıtynyn jáne de olardyń bir taktıkany qoldanatynyn eskeretin bolsaq, bul sózdiń de jany bar. Iá, shyn máninde, «tıkı-taka» stıli búginde ózektiliginen aıyrylǵan sekildi, oǵan qarsy qalaı oınaý kerek ekenin talaı myqty bapkerler kórsetip berdi. Al Konfederatsııa kýbogynyń fınalynda Brazılııadan ońbaı utylǵan Ispanııa ol jeńilisten sabaq almaǵan bolyp shyqty.
Sońǵy jyldardaǵy álem chempıonattaryna kóz júgirtsek, myqtynyń masqara bolyp, chempıondyq taqtan túsýi naǵyz úrdiske aınalyp kele jatqanyn baıqaýǵa bolady. Sonymen sanamalap kóreıik.
2002, Frantsııa
Sol jyly Álem jáne Eýropa chempıondary frantsýzdar Japonııa men Koreıaǵa dodanyń basty favorıti esebinde kelgeni este. Alaıda jaraqat alǵan Zıdansyz úshjolaqtylar aldymen Senegalǵa ese jiberse, keıin Ýrýgvaı qaqpasyna dop soǵa almady. Sheshýshi kezdesýge Zızýdyń shyqqany da kómektespedi, psıhologııalyq turǵydan saǵy synǵan Roje Lemerr shákirtteri Danııadan 0:2 esebimen utylyp, úılerine erte qaıtty. Bul quramanyń negizin de qartaıǵan juldyzdar quraǵanyn eske sala keteıik.
2010, Italııa
Ońtústik Afrıkada álem chempıondary taǵy da toptyq synda súrindi. Paragvaı, Slovakııa, Jańa Zelandııamen bir topqa túsken ıtalıandyqtar sońǵy tórtinshi oryn alady dep eshkim oılamaǵan edi. Birde bir jeńiske qol jetkize almaǵan Marchello Lıppıdiń komandasy bar abyroıyn aırandaı tókti.
2014, Ispanııa
Sońǵy tórt álem chempıonatynyń úsheýinde keshe ǵana dúnıeni dúr silkindirgen fýtbolshylardyń ortańqol komandalardyń ózine álderi jetpeı jatty. Ispanııa da buǵan deıin Frantsııa men Italııanyń júrip ótken jolyn qaıtalamas úshin olardyń jibergen qatelikterin eskerýi qajet edi. Endi mine «altyn quram» elge qaıtýǵa májbúr. Havı, Habı Alonso sekildi juldyzdar endi quramadan ketetinin málimdegen edi. Chempıondardyń bulaı ketkeni ókinishti, árıne.
P.S. Bul fýtbol. Alańda kim jeńiske jetetinin keıde boljap bilý múmkin emes. Álemdegi №1 sport osymen de qyzyqty. Dúnıe kezek. Búgin shyń basynda basqalarǵa joǵarydan qarap turǵan sportshylar erteń jankúıer aldynda qarabet bolyp, olardan keshirim suraýǵa májbúr bolyp jatady. Jeńilisten keıin bas kótere biletin er minezdi fýtbolshylardyń ónerine súısinip qaraıtyn bizdiń jastarǵa osy jaıt úlken ómirlik sabaq bolsyn dep tileıik. Al biz Brazılııada jańa chempıonnyń esimin biletin bolamyz. Ispanııa bosatqan «taqqa» aldaǵy tórt jyl boıy kim jaıǵasady?