Abzal Serik bokstan Azııa chempıonatynda kúmis medal aldy

ASTANA. QazAqparat – Bokstan 22 jasqa deıingi sportshylar arasyndaǵy Azııa chempıonatynda qazaqstandyq Abzal Serik kúmis júldeger boldy, dep habarlaıdy QazAqparat tilshisi.

Qurlyqtyq dodada Abzal Serik (67 keli) Behzod Hamıdovpen sharshy alańǵa shyqty. Alǵashqy eki raýndta qarsylastar tartysty jekpe-jek ótkizdi. Tóreshiler ózbekstandyq boksshynyń basymdyǵyn kórsetti. Nátıjesinde Abzal Serik qarsylasyna ese jiberip, kúmis medaldy qanaǵat tutty.

Eske salsaq, búgin qurlyqtyq dodada Sanjar Táshkenbaı (48 keli) men Nursultan Altynbek (54 keli) jeńimpaz tuǵyryna kóterildi.

Sondaı-aq, Mahmýd Sabyrjan (57 keli) taılandtyq Saravýt Sýkthettyń osal tusyn tapty.

Endi el quramasynan Sabyrjan Aqqalykov (71 keli) ózbekstandyq Nýrıslom Ismoılovpen, Dıas Moljigitov (75 keli) taǵy bir ózbekstandyq Alohon Abdýllaevpen sheberlik baıqasady.

Foto: instagram.com/abzal_asg