Abzal Quspannyń «Alash zańgerleri» kitaby tanystyryldy

ASTANA. QazAqparat - Ulttyq akademııalyq kitaphanada belgili zańger, Parlament Májilisiniń depýtaty Abzal Quspannyń «Alash zańgerleri» atty kitabynyń tanystyrylymy ótti, dep habarlaıdy QazAqparat.

Kitapta HH ǵasyrdyń basyndaǵy qazaq zańgerleri jaıynda maǵlumat berilgen. Olardyń qysqasha ómirbaıany, qoǵamda atqarǵan isteri men eldegi zań salasynyń damýyna qosqan úlesteri baıandalǵan.

HH ǵasyr qazaq halqy úshin qasiretti ǵasyrlardyń biri. Keńestik dáýirden qalyptasqan qaǵıdada qaýipsizdik organdarynyń atasy dep F. Dzerjınskııdi ataıdy. Tyń taqyrypqa tuńǵysh qalam terbegen týyndy avtory qazaqtan da quqyq, zań iliminiń qalyptasýyna, damýyna úles qosqan talaı tulǵalardyń bolǵanyn tarıhı derektermen dáleldeıdi.

Jıynda Abzal Quspan «Alash zańgerleri» degende bylaısha túsinik beredi:

«Bul Alashordaǵa, Alash arystaryna ǵana qatysty dúnıe emes. Alash – qazaqtyń urany. Alash desek – qazaq, qazaq desek – Alash dep túsinýimiz kerek. Ekeýi bir uǵym. Bul – bir. Bizde qalyptasyp qalǵan bir dúnıe bar: «KSRO-ǵa qyzmet etken kommýnısterdiń bári ońbaǵan, alashordalyqtar myqty», – deıdi. Kommýnıstik ıdeıaǵa senip, sol ıdeologııaǵa qyzmet etkender de stalın­dik repressııa qurbany bolǵan joq pa? Olardyń ishinde de qazaqqa jany ashyǵan, Alash ıdeıasyna adaldyq tanytqan tulǵalar az bolmaǵan. Sondyqtan tek alash ordalyqtar ǵana atylǵan joq, qyp-qyzyl kommýnıster de atylyp ketti. Olardyń arasynda qýǵyn kórip, sottalyp kelgenderi de bar. Bul kitapqa kommý­nıster de, eshqandaı partııaǵa qyzmet etpegen tulǵalar da engen», – deıdi.

Bul kitap zań salasynda qyzmet etetin mamandarǵa jáne HH ǵasyrdyń basyndaǵy qazaq ıntellegentsııasy taqyrybyna qyzyǵatyn qalyń oqyrmanǵa arnalǵan.

Tanystyrylymǵa elimizge tanymal zańgerler, zııaly qaýym ókilderi, sala mamandary, oqyrmandar qatysty.