Abzal Quspan elge aqshany qaıtarýǵa qatysty depýtattardyń talabyn jarııalady
«Memleket basshysynyń bastamasymen elden zańsyz jolmen shyǵarylǵan qarajatty qaıtarý, sondaı-aq zańsyz jolmen alynǵan ekonomıkalyq resýrstardyń monopolııalyq (olıgopolııalyq) shoǵyrlanýyn anyqtaý, olardy memleketke qaıtarýǵa baǵyttalǵan birqatar tapsyrma berilgen. Máselen, Memleket basshysynyń 2022 jylǵy 5 maýsymdaǵy Jarlyǵyna sáıkes, elden zańsyz shyǵarylǵan aktıvterdi qaıtarý maqsatynda vedomstvoaralyq komıssııa qurylyp, onyń tóraǵasy bolyp Bas prokýror bekitilgen edi. 2022 jyldyń 26 qarashasynda Prezıdent «Zańsyz shyǵarylǵan aktıvterdi memleketke qaıtarý jónindegi sharalar týraly» Jarlyqqa qol qoıǵan bolatyn. Osy oraıda Úkimet basshysyna birqatar tapsyrma júkteldi. Endi, osy eki qujattyń talaptaryna qarasaq, tolyq deńgeıde oryndalmaǵanyn baıqap otyrmyz», - dedi A. Quspan Premer-Mınıstr men Bas prokýrordyń atyna joldaǵan saýalynda.
Osy oraıda depýtat 31 naýryzǵa deıin Májiliske tıisti zań jobasyn engizý tapsyrmasy oryndalmaǵanyn aıtty.
«Sonymen qatar zańsyz shyǵarylǵan aktıvterdi qaıtarý rásimderiniń jarııalyǵyn qamtamasyz etý týraly talap qoıylǵan. Osy oraıda biraz buqaralyq aqparat quraldaryn qarap shyqtym. Alaıda, qoǵamǵa anyq aqparat berilmeı otyrǵanyn baıqadym. Bul turǵyda qoǵam jaǵynan qoıylatyn suraqtar óte kóp. Atap aıtqanda, qansha qarajat elge qaıtaryldy? Іshtegi olıgopolııa ókilderinen qansha qarajat óndirildi? Olardyń qaı bóligi qarajatty óz erkimen qaıtardy? Májbúrli túrde qaıtarǵandarǵa qatysty qylmystyq ister qozǵaldy ma? Ázirge, osy suraqtarǵa jaýap berilmeı otyr», - dedi Abzal Quspan.
«Bul másele qatysty depýtattardyń ózderinde málimet bolmasa, onda aktıvterdi qaıtarýmen baılanysty aldymyzǵa túsetin zań jobasyn qalaı, qaıtip qabyldamaqpyz. Osy oraıda bir top depýtattyń atynan eki talap qoıyp otyrmyz.
Birinshiden, Bas prokýror byltyrǵy maýsym aıynan bastap aktıvterdi qaıtarýǵa baǵyttalǵan arnaıy komıssııanyń osy kezge deıin atqarǵan qyzmeti týraly tolyq aqparat joldaýy qajet.
Ekinshiden, Bas prokýror basqaratyn vedomstvoaralyq arnaıy komıssııaǵa jáne Úkimet janyndaǵy jumys toptaryna mamandyqtary sáıkes keletin depýtattardyń da qatysýyn qamtamasyz etý kerek», - dedi depýtat.