Abzal Quspan Bas prokýrorǵa Altaı Kólginov qol qoıǵan qaýly jóninde saýal joldady
«Ákimniń qaýlysyna sáıkes, qala turǵyndaryna baǵbandyqpen aınalysý úshin „Venera“ baǵbandyq seriktestigi arqyly jer ýchaskeleri zańsyz berilgen. Zańsyzdyǵy sol, atalǵan jer ýchaskeleri Jaıyq ózeniniń rekreatsııalyq sý qorǵaý aımaǵyna jatady, qalyń aǵash ósip tur soǵan qaramastan ol jerler Jaıyq-Kaspıı basseın ınspektsııasynyń kelisiminsiz berilgen. Nátıjesinde qoldanystaǵy Jer kodeksi, Sý kodeksi, Ekologııa kodeksimen, 200 myńǵa jýyq jer kezeginde turǵan oraldyqtardyń konstıtýtsııalyq quqyqtary buzylǵan», — dedi depýtat.
Onyń málimetinshe, qala ákiminiń ókili sotta zańbuzýshylyqpen tolyq keliskenimen, jer berilgenine 3 jyldan astam ýaqyt ótip ketkenin alǵa tartyp, ýákiletti organnyń talap aryzyn qanaǵattandyrýdan bas tartýdy suraǵan.
Prokýratýra ókili de qalalyq ákimshilikti qoldap qorytyndy bergen. Sýdıa da olarmen kelisip, talap aryzdy qanaǵattandyrýsyz qaldyrady.
Oral qalasynyń sol kezdegi ákimi A.Kólginov qol qoıǵan qaýly boıynsha, zańsyz jer ýchaskesin alǵan jer ıeleriniń aldaǵy kóktemde Jaıyq jaǵasyndaǵy aǵashtardy qyrqyp, tabıǵatqa ólsheýsiz zııan keltire otyryp, qurylys jumystaryn bastaýyna keńinen jol ashyldy.
«Sebebi qolynda Joǵarǵy sottyń sheshimi bar. Ol, óz kezeginde qala turǵyndary men tabıǵat janashyrlarynyń ashý-yzasyn týdyratyny túsinikti, alaıda ol jer ıeleriniń qurylys júrgizýine endigi jerde eshkim tosqaýyl qoıa almaıdy. Sonymen qatar, osy ispen aınalysý barysynda, qolyma „Venera“ baǵbandyq seriktestiginiń aryzy boıynsha jergilikti antıkor tarapynan júrgizilgen tergeý materıaldary tústi. Oǵan sáıkes 2019 jyldan bastap osy fakt boıynsha tirkelgen qylmystyq is eki ret qysqartylǵan», — deıdi Abzal Quspan.
Depýtat jerdi múddeli adamdarǵa rásimdeýdiń quıtyrqy shemasy bolǵanyn aıtady.
«Mine, meniń qolymda — atalǵan seriktestik basshysy 2019 jyldyń 13 mamyrynda qolyn qoıyp, mórin basqan aryz. Oǵan sáıkes, Jaıyq ózeni boıyndaǵy jerler áý basta jergilikti ákimdik, jerge ornalastyrý jónindegi memlekettik jobalaý ınstıtýty men prokýratýra qyzmetkerleri usynǵan tizim boıynsha óz kisileriniń, oryssha aıtqanda „podstavnoı“ adamdar atyna rásimdelip, keıin basqa adamdarǵa aýystyrylǵan. Bul faktiler tergeý barysynda anyqtalsa da, qylmystyq is búgingi kúni toqtap tur. Eń qyzyǵy, dál osy qylmystyq is tergelip jatqan tusta, 2022 jyldyń 30 jeltoqsanynda, ıaǵnı jańajyldyq qarbalasty paıdalanyp áldekimder jerge ornalastyrý jónindegi memlekettik jobalaý ınstıtýtynyń arhıvine qasaqana órt qoıǵan, sonyń saldarynan jer kadastrynyń málimetter bazasy ornalasqan server janyp ketken. Qazirgi tańda bul qylmystyq is te kúdiktiniń tabylmaýyna baılanysty toqtatylǵan», — deıdi ol.
Saýal ıesi quzyrly organ basshysynan Joǵarǵy sottyń osy kúmándi sheshimine taldaý júrgizý kerek dep esepteıdi.
«Qurmetti Berik Noǵaıuly, sizden BQO-daǵy áleýmettik shıelenisterdiń aldyn alý maqsatynda Joǵarǵy sottyń azamattyq ister boıynsha qalyptasqan sot tájirıbesine taldaý júrgizip, prokýrorlyq yqpal etý sharalaryn qoldanýdy suraımyn», — dedi Abzal Quspan.