Abylaı hannyń Qytaı ımperatorymen jazysqan hattary tabyldy

ASTANA. 11 qyrkúıek. QazAqparat - Abylaı hannyń Qytaı ımperatorymen jazysqan hattary tabyldy, onda sensatsııalyq málimetter bar. Bul týraly búgin Astanada ótken baspasóz máslıhatynda QR Ulttyq ǵylym akademııasynyń akademıgi, tarıh ǵylymdarynyń doktory, professor Merýert Ábýseıitova málim etti. Eske sala keteıik, Qytaıdan qazaq ǵalymdary 283 tomdy quraıtyn biregeı muraǵattyq qujattardy ákelgen bolatyn Onyń arasynda Abylaı han men Qytaı ımperatory Tsıanlýnnyń jazysqan hattarynyń kóshirmeleri de bar bolyp shyqty.

«Qazir Abylaı hannyń 300 jyldyǵyna arnalǵan úlken shara daıyndalýda. Bul sırek qujattar - Abylaı hannyń kórshi elderdiń basshylarymen jazysqan hattary. Bul sensatsııalyq materıaldar, onda qazaq handary men qytaı basqarýshylarynyń arasyndaǵy dıplomatııalyq baılanystyń ornatylǵany jóninde kórsetilgen. Qujatta senimdi baılanys ornaǵanyn kórýge bolady, Abylaı han men Tsıanlýn alysqan kóp hattarda tilek, quttyqtaý bildirilgen, tipti Qazaq handyǵynyń Tsın ımperııasynda elshi taǵaıyndaǵany jóninde málimet bar», - deıdi Merýert Ábýseıitova.
Onyń aıtýynsha, aldaǵy ýaqytta ǵalymdar mundaı qujattardyń álemde balamasy joq elektrondy nusqasy men tizbesin jasaýdy qolǵa almaq. «Bul Qazaqstan tarıhy, mádenıetiniń jádigerlerin, qaǵaz betine túsken derekterin, muraǵat metarıaldaryn qamtıdy»,- deıdi M. Ábýseıitova.