Abylaı hannyń 300 jyldyǵyna arnalǵan konferentsııaǵa birqatar sheteldik ǵalymdar shaqyrylyp otyr
Bul jóninde búgin Astanadaǵy «Qazmedıa ortalyǵynda» Ulttyq tarıhty zerdeleý jónindegi vedomstvoaralyq komıssııasynyń múshesi, «Memleket tarıhy ınstıtýty» mekemesiniń dırektory Búrkitbaı Aıaǵan málimdedi.
Eske salsaq, Abylaı hannyń 300 jyldyǵyn merekeleý aıasynda 5 qazanda Kókshetaýda «Abylaı han jáne onyń tarıhı dáýiri» taqyrybynda halyqaralyq ǵylymı-tájirıbelik konferentsııa ótedi. Sonymen qatar Abylaı han alańynda mádenı sharalardy ótkizý josparlanǵan. Munymen qosa, Kókshetaý mańyndaǵy Qyzyljar atshabarynda «Azat rýhtyń Abylaı hany» atty teatrlandyrylǵan qoıylym uıymdastyrylmaq.
«Bıyl memleket qaıratkeri, daryndy qolbasshy ári saıasatker Abylaı hannyń dúnıege kelgenine 300 jyl tolyp otyr. Soǵan oraı, Kókshetaý qalasynda uıymdastyrylatyn konferentsııaǵa belgili ǵalymdar, sarapshylar, ǵylymı uıymdardyń qyzmetkerleri, joǵary oqý oryndarynyń oqytýshylary, qazaqstandyq jáne sheteldik qoǵamdyq uıym ókilderi qatysatyn bolady. Olardyń arasynda Reseı akademııasynyń akademıgi, tarıh ǵylymdarynyń doktory Nellıa Bekmahanova, Daǵystan Respýblıkasynyń eńbek sińirgen qaıratkeri, tarıh ǵylymdarynyń doktory, professor Danııal Qadyrnııazov, Ystambul ýnıversıtetiniń professory Mehmet Saraı, Júsip Balasaǵun atyndaǵy Qyrǵyz ulttyq ýnıversıtetiniń professory Shaıyrkúl Batyrbaeva, Indıana ýnıversıtetiniń ǵylymı qyzmetkeri Maıkl Henkok bar», - dedi B. Aıaǵan.
Al qazannyń 25-inde Taraz qalasynda qazaqtyń uly bıi, kórnekti qaıratker Tóle bıge arnalǵan eskertkish ashylady. Osy kúni Tarazda da keshendi sharalar uıymdastyrylady, onyń ishinde ǵylymı-praktıkalyq konferentsııalar da qarastyrylǵan.
B. Aıaǵannyń aıtýynsha, atalmysh konferentsııalarda qazaqtyń otarshyldyq kezeńdegi tarıhı máselelerine qatysty suraqtar keńinen talqylanyp, alqaly jıynda sóz sóılegenderdiń baıandamalary arnaıy jınaq bolyp shyǵady. «Qazaqstannyń tarıh ǵylymyn jańǵyrtý jónindegi barlyq sharalar, onyń ishinde ádistemelerdi jańartý, bazalyq oqý quraldaryn qurý sharalary Memleket basshysynyń tapsyrmasyna oraı atqarylýda», - dedi B. Aıaǵan.