«Ábý-Dabı Plaza» qurylysynda jumys isteıtin qazaqstandyqtar sany 3-4 ese artady
20 jeltoqsandaǵy jaǵdaıǵa sáıkes nysanda atqarylǵan jumystardyń jalpy kólemi 82% quraıdy. Barlyq bloktardyń qurylysy jalǵasyp jatyr. «R» blogynda kirpishpen qalaý, árleý jáne ınjenerlik júıelerdi ornatý jumystary júrgizilýde. Basqa bloktarda ınjenerlik júıeler men jabdyqty ornatý, árleý jumystary jalǵasyp jatyr. Aýa ótkizgish júıeler, ınjenerlik júıeler men aspaly panelder qurastyrylyp, daıyndalatyn óndiristik tsehtyń qurylysy aıaqtalǵan.
Záýlim ǵımaratty salyp jatqan qurylys kompanııalarynyń ókilderi bloktardyń qurylysyn aıaqtaý merzimin atady. Osylaısha, «H» jáne «P» bloktary naýryzda, «Z», «O» jáne «Y» bloktary maýsymda paıdalanýǵa beriledi dep josparlanýda. «R» blogynyń qurylysy 2019 jyldyń maýsymynda aıaqtalmaq.
Investıtsııalar jáne kásipkerlikti damytý basqarmasynyń málimetinshe, qazirgi tańda «Ábý-Dabı Plaza» KFK jobasy boıynsha 1400 jumysker eńbek etedi. Onyń 56% - Qazaqstan azamattary. Aıta ketý kerek, 2019 jyldyń shildesine deıin mundaǵy jumyskerlerdiń sany 2350 adamǵa deıin artady. Bul rette jergilikti jumyskerlerdiń sany 3,4 esege nemese 1605 adamǵa artady dep kútilýde. Al sheteldik jumys kúshi 3,6 esege nemese 745 adamǵa ulǵaıtylmaq. Shildede jumyskerlerdiń sanyn 3300 adamǵa deıin arttyrý kózdelýde. Onyń 60-65% - jergilikti kadrlar.
«Biz basqarýshy kompanııamen birlesip, qazirdiń ózinde, ıaǵnı bir jyl buryn ǵımaratqa qyzmet kórsetetin mamandardy daıarlaý jumystaryn bastaýymyz kerek. Biz mamandardy qazaqstandyqtardan aldyn ala daıyndaı alýymyz qajet», - Astana ákimi Baqyt Sultanov.
Kezdesý barysynda belgili bolǵandaı, búgingi tańda jumyskerlerge jalaqy tóleý boıynsha problemaly másele joq.
«Jalaqy boıynsha qaryzǵa qatysty eshqandaı shaǵym joq. Tólemderdi ýaqytynda alyp otyrǵandyqtan, merdiger buǵan bara almaıdy», - deıdi Aldar Properties PJSC jobasyn basqarý jónindegi aǵa vıtse-prezıdent Ábdel Hammıt Goýl.
«Ábý-Dabý Plaza» kesheni túrli saladaǵy bloktardan turady. Máselen, onda keńseler, qonaq úı, meıramhanalar, saýda ortalyǵy, turǵyn úı kesheni ornalasady. Keshenniń qurylysy 2011 jyldyń naýryzynda bastalǵan bolatyn. Qurylys jumystary 2020 jyly aıaqtalady dep josparlanǵan. «Ábý-Dabı Plaza» Qazaqstan men Ortalyq Azııadaǵy eń bıik ǵımarat bolmaq. Onyń bıiktigi 78 qabatty nemese shamamen 382 metrdi quraıtyn bolady. «Ábý-Dabı Plazanyń» jalpy aýdany 510 myń sharshy metrden asýy tıis. .