«Ábý-Dabı Plaza» kesheninde jańa jumys oryndary ashylady

ASTANA. QazAqparat - Elordada jańa jumys oryndaryn ashýǵa qatysty birneshe basqarma arasynda ózara yntymaqtastyq týraly memorandým jasaldy, dep habarlaıdy QazAqparat tilshisi Astana qalasy jumyspen qamtý, eńbek jáne áleýmettik qorǵaý basqarmasyna silteme jasap.

«Qujatqa qol qoıý taraptardyń uzaq merzimdi seriktestigin qurýǵa baǵyttalǵan, atap aıtqanda, jumyspen qamtý ortalyǵynda tirkeýde turǵan azamattarmen qosa elorda turǵyndaryn jumysqa ornalastyrý úshin jaǵdaı jasaý, sondaı-aq Astanadaǵy «Ábý-Dabı Plaza» kesheni jumysy sheńberinde kadrlardy daıarlaý jáne qaıta daıarlaý», - delingen basqarma habarlamasynda.

Habarlamada aıtylǵandaı, atalǵan memorandým Astana qalasynyń jumyspen qamtý, eńbek jáne áleýmettik qorǵaý, Investıtsııalar jáne kásipkerlikti damytý basqarmasy men «ALDAR EvroAzııa» JShS arasynda jasaldy.

Sondaı-aq, basqarma málimetinshe Astanada jańa nysandardy iske qosý men qoldanystaǵy kásiporyndardyń damýy nátıjesinde jyl saıyn 19-20 myń turaqty jumys orny paıda bolady.

«Búgingi kúni Astanada ekonomıkalyq belsendi halyq sany 531,3 myń adamdy qurasa, jumyspen qamtylǵan halyq sany - 507,2 myń adam. Astananyń ındýstrıaldy-ınnovatsııalyq jáne áleýmettik-ekonomıkalyq damýynyń aıasynda, «Ábý-Dabı Plaza» nysanynda jańa jumys oryndaryn qurý elordamyzdyń eńbek naryǵyndaǵy jaǵdaıyn turaqtandyrýǵa múmkindik beredi», - dep jazylǵan resmı habarlamada.