Ábý-Dabı bıligi ekpe almaǵandarǵa qoǵamdyq oryndarǵa barýǵa tyıym saldy

ÁBÝ-DABI. QazAqparat – 20 tamyzdan bastap Ábý-Dabıdiń qoǵamdyq oryndaryna tek COVID-19-ǵa qarsy ekpe alǵandar ǵana bara alady. Bul týraly Ábý-Dabıdiń Tótenshe jaǵdaılar, daǵdarys jáne tabıǵı apattar jónindegi komıtetiniń sheshimine silteme jasap ámirlik bıliginiń baspasóz qyzmeti málim etti, dep habarlaıdy QazAqparat.

Bul sheshim saýda ortalyqtary, meıramhanalar, dámhanalar, demalys oryndary, sport ortalyqtary, saýyqtyrý klýbtary, shıpajaılar, murajaılar men mádenı ortalyqtar, taqyryptyq sabaqtar, ýnıversıtetter men ınstıtýttar, mektepter men balabaqshalardy qamtıdy. Odan bólek, vaktsınasyz saýda úılerinen tys ornalasqan dúkenderge kirýge bolmaıdy. Alaıda birinshi qajettiliktegi taýarlardy satatyn sýpermarketter men dárihanalarǵa kirýge ruqsat etilgen.

Bıliktiń aıtýynsha, bul tyıymdar 16 jasqa deıingi balalar men vaktsına alýyna bolmaıtyn adamdarǵa júrmeıdi.

Elde koronavırýs juqtyrǵandar sany táýligine ortasha eseppen shamamen 2,1 myń adamdy qurap otyr, bul kórsetkish sońǵy aı boıy birtindep ósip keledi.