Ábsattar Derbisáli: Ál-Farabı - álemdik deńgeıdegi, qupııaǵa toly tulǵa

ALMATY. QazAqparat – Ál–Farabı qazaq halqynyń maqtanyshy, álemdik deńgeıdegi tulǵa. R.B. Súleımenov atyndaǵy shyǵystaný ınstıtýtynyń dırektory Ábsattar qajy Derbisáli ǵulama ǵalym týraly osylaı pikir aıtty, dep habarlaıdy QazAqparat tilshisi.

Onyń paıymynsha, ál-Farabıdi, Abaıdy nasıhattaý arqyly Qazaqstandy da nasıhattaımyz. Álem Qazaq elin osy ǵulamalar arqyly da tanı túsedi.

«Ál– Farabı tek qazaq halqynyń ǵana emes álemdik deńgeıdegi tulǵa. Biz ál-Farabı men Abaıdy kóterý arqyly elimizdi kóterip, nasıhattap jatyrmyz. Osy tulǵalar arqyly Táýelsiz elimizdiń bedelin arttyryp otyrmyz. Bul kisi ómir boıy bilim izdegen adam. Ony nasıhattaý ár adamnyń paryzy dep oılaımyn. Ol keleshek urpaq úshin qajet. Resmı derekterge súıener bolsaq, 200-ge jýyq shyǵarma jazǵan adam. Sonyń 100-ge jýyǵy bizge jetip otyr. Ál – Farabıdi áli de zertteý qajet. Ol qupııaǵa toly tulǵa», – dedi Ábsattar Derbisáli.

Shyǵystanýshy osydan elý jyl buryn Ábý Nasyr ál-Farabıdiń 1100 jyldyǵyna arnalǵan konferentsııaǵa qatysqanyn aıtty.

«1975 jyly Almaty qalasynda ál– Farabıdiń 1100 jyldyq konferentsııasyna qatysqan edim. Sodan beri jarty ǵasyr ýaqyt ótti, talaı dúnıe ózgerdi. Qazaqstan táýelsiz el boldy. Ál– Farabı babamyzdyń murasy tereńirek zertele bastady, onyń atymen osy joǵary oqý orny atalady. Sonymen qatar ,oıshyldyń esimi kóshelerge berilip jatyr. Osynyń ózi úlken baqyt»,- deıdi ol.

Búgin Qazaqstan ál-Farabıdiń 1150 jyldyǵyn merekeleýdi resmı túrde bastady.

Foto: anatili.kazgazeta.kz