Ábish Kekilbaıulynyń shyǵarmalary álemniń 16 tiline aýdaryldy
Bul týraly búgin «Ábish álemi» atty oqý kongresinde QR Mádenıet jáne sport mınıstri Aqtoty Raıymqulova aıtty, dep habarlaıdy QazAqparat tilshisi.
Saltanatty sharada Memlekettik hatshy Qyrymbek Kósherbaevtyń quttyqtaý hatyn oqyp bergen Mádenıet jáne sport mınıstri jınalǵandarmen aqjoltaı jańalyqtarymen bólisti.
«Abyz aǵamyzdyń shyǵarmalary álemniń 16 tiline, sonyń ishinde bıyl «Ańyzdyń aqyry» romany orys, aǵylshyn, frantsýz tilderine aýdaryldy. Ábish aǵanyń shyǵarmashylyǵyn nasıhattaý maqsatynda elimizde kóptegen sharalar atqaryldy. Sonyń ishinde Ábish Kekilbaevtyń «Ańyzdyń aqyry» romany Qazaqstan Respýblıkasynyń Ulttyq akademııalyq kitaphanasynyń eń úzdik jobalarynyń biri «Bir el – bir kitap» respýblıkalyq aktsııasy aıasynda jalpyhalyqtyq oqýǵa ıe boldy. 4 myńnan astam otandyq kitaphanany qamtyǵan bul joba aıasynda 700 myńnan astam oqyrman Ábish aǵamyzdyń shyǵarmasyn oqydy»,- dedi Aqtoty Raıymqulova.
Bul rette kitaptyń oqyrmanǵa jetýine dáneker bolatyn qasıetti oryn – kitaphananyń, kitap pen avtordy kezdestiretin rýhanı ordanyń shyraqshylary – kitaphanashylardyń eńbegine erekshe toqtalǵan mınıstr aldaǵy jyldan sala qyzmetkerleriniń jalaqysy 50 paıyzǵa ósetinin aıtty.
Jazýshynyń ádebıeti men shyǵarmashylyǵyn, qazaq ádebıetiniń qundylyqtaryn halyqaralyq ǵylymı bilim berý júıesinde nasıhattaý jáne kópshilikke taratýdy maqsat tutqan kongress aıasynda Ábish Kekilbaıulynyń 20 tomdyq kitaptarynyń tusaýkeseri ótti.
Saltanatty sharaǵa fılologııa ǵylymdarynyń doktory, professor, jazýshy Myrzataı Joldasbekov, Qazaqstan Jazýshylar odaǵynyń basqarma tóraǵasy Ulyqbek Esdáýlet, jazýshy, QR Memlekettik syılyǵynyń laýreaty Tólen Ábdik, synshy, ádebıettanýshy, memleket jáne qoǵam qaıratkeri Sultan Orazalınov syndy tanymal tulǵalar qatysty.