Ábish Kekilbaıulynyń mereıtoıy týǵan jerinde atalyp ótti
Ábish Kekilbaıuly Kekilbaev 1939 jyly 6 jeltoqsanda Mańǵystaý aýdanyna qarasty Ondy aýylynda dúnıege kelgen. Jazýshynyń týǵan aýylyna jınalǵan qonaqtar, aldymen «Aı-Ana» memorıaldyq-eskertkishine gúl shoqtaryn qoıdy. «Aı-Ana» kesheni el analarynyń qurmetine, Ábishteı danany dúnıege ákelgen Aısáýle anaǵa arnap turǵyzylǵan.
Meımandar Ábish Kekilbaıuly bilim alǵan Ondy orta mektebinde bolyp, bilim oshaǵynyń tarıhymen tanysty. Arnaıy uıymdastyrylǵan tanymdyq sharalardy tamashalady. Mektepte «Ábish oqýlary» respýblıkalyq baıqaýy jyl saıyn ótkizilip turady.
Merekelik sharalar aýdan ortalyǵy Shetpe aýylynda jalǵasty. Ortalyq alańda «Ábish aýyly» kıiz úı-qalashyǵy boı túzedi. Qaz-qatar 30 kıiz úı tigilip, úsh myńǵa jýyq adam jınaldy. Aýdan turǵyndary men qonaqtar astan dám tatyp, kontserttik baǵdarlamany tamashalady.
Mańǵystaý aýdanynda ótken merekelik keshte Qazaqstannyń ár aımaǵynan jınalǵan sazgerlerdiń Ábish Kekilbaev pen Farıza Ońǵarsynovaǵa arnap shyǵarǵan ánderi shyrqaldy. Oǵan Jambyl oblysynan «Farıza jan» ániniń avtory, QR mádenıet salasynyń úzdigi Ábıirbek Tináli, Almaty qalasynan qazaq estradasynyń jaryq juldyzy Roza Álqoja, Qyzylorda oblysynan kompozıtor Jaqsygúl Begmanova, Aqtóbe oblysyna Marǵulan Qulmaǵanbetov jáne mańǵystaýlyq aqyn-sazgerler qatysty.
Mańǵystaý aýdandyq mádenıet úıinde Mańǵystaý oblystyq fılarmonııasy ártisteriniń qatysýymen «Munartaý» atty kontserttik baǵdarlama usynyldy. Sharada abyzdyń «Mahambet tolǵaýy», «Qarataý» «Quz basynda qulja tur» sııaqty óleńderi maqam sazben ádeptelip, jyr túrinde usynyldy, arnaıy jazylǵan ánder oryndaldy.
Jazýshynyń 80 jyldyq mereıtoıyn mádenıet úıinde ótken jazba aqyndar múshaırasy qorytyndylady.