«Ábish álemi» teatr festıvali «Kúı» týyndysymen ashyldy

AQTAÝ. QazAqparat - «Abish alemi» birinshi halyqaralyq teatr festıvaliniń shymyldyǵy abyz jazýshynyń «Kúı» povesi jelisimen qoıylǵan spektalmen ashyldy. 1 saǵat 20 mınýtqa sozylǵan premerany N. Jantórın atyndaǵy oblystyq mýzykalyq drama teatrynyń ujymy sahnalady, dep habarlaıdy QazAqparat tilshisi.

Kórshiles eki el arasyndaǵy óshpendilik. Daý men kek. Máńgúrtke aınalǵan tutqyndar. Qoıylym jelisi osylaı órbıdi. Spektaklden kórermen qıly zamandarda ómir súrgen halyqtyń taǵdyryn kóre alady. Bir ereksheligi, qoıylym jazýshynyń birneshe shyǵarmasyn biriktirgen.

«Ábish Kekilbaıulynyń «Kúı» povesiniń jelisimen qoıylǵan. Oǵan jáne «Ańyzdyń aqyry» romanynyń, «Aqsaq temirdiń», «Sheberdiń» sıýjetin qostyq. Janry drama deýge keledi. Men ıllıýstratsııa dep atadym. Óıtkeni kitap oqyǵandaı áser beredi. Kekilbaevtyń sózin joǵaltpaı, sahnadan aıtyp turmyz»,-deıdi rejısser Gúlsına Merǵalıeva.

Teatr ujymy spektakldi sahnalaýǵa birneshe aı daıyndalǵan. Premeraǵa alys-jaqynnan kelgen meımandardyń qoshemeti zor boldy.

«Akterlik sheberlik, spektakl dekoratsııasy, súıemeldegen áýender óte myqty boldy. Saýatty qoıylǵan. Rejısserlik jaǵynan úzdik shyqqan. Jalpy biz, Tbılısı qalasyndaǵy Ázerbaıjan memlekettik teatrynyń ujymy Qazaqstanǵa alǵash ret kelip turmyz. Anton Chehovtyń «Aıý» spektaklin usynamyz»,-deıdi Ázirbaıjan memlekettik drama teatrynyń rejısseri týrgaı Velızade.

«Ábish álemi» teatr festıvali alǵash ret halyqaralyq deńgeıde ótýde. Sharaǵa Armenııa, Grýzııa, Iran, Ózbekstan, Tájikstan, Túrkııa, Túrikmenstan elderiniń teatrlary qatysýda.

«Osydan 2 jyl buryn respýblıkalyq festıval boldy. Endi halyqaralyq deńgeıge shyqty. Qýanyshtymyn. Qazaq úshin úlken toı. Jańa «Kúı» spektaklin kórdik. Іzgilik pen shyndyqty beıneledi. Álemdi ne qutqarady, shynymende adamdy taza nıet qutqarady. Jer betinde júrgende izgilik kerek»,-deıdi Qazaqstannyń eńbek sińirgen qaıratkeri Nurken Óteýil.

4 kúnge sozylatyn festıvalde ár elden kelgen óner ujymdary 10 spektakldi sahnalaıdy. Kún saıyn saǵat tańerteńgi 11, túski 3, keshki 7-de N. Jantórın atyndaǵy drama teatrda qoıylymdardy tegin tamashalýǵa bolady.