Ábilıazovtyń «sybaılasy» Vengrııadan Qazaqstanǵa óz erkimen keldi
Erjan Qadesov byltyr Vengrııada ustalyp, otanyna ekstradıtsııalanýdy kútip jatqan bolatyn.
«Birneshe jyl qatarynan Muhtar Ábilıazovtyń kompanııalarynda jumys jasadym. Keıinirek BTA bankiniń aqshasy osy kompanııalar arqyly shyǵarylǵan edi. Maǵan qarsy qylmystyq is ashyla bastady. 2009 jyly Ábilıazovtyń júıesinde jumys istegen qyzmetkerler elden qasha bastaǵanda, men de kópten qalmaı ketip qaldym. Vengrııada turdym.
2016 jyly Interpol arqyly meni ustap áketti. Ábilıazovtyń adamdary bul saıası oıyn dedi. Biraq men is nasyrǵa shapqanyn túsindim. Bárinen sharshaǵan soń týysqandarym men qorǵaýshylarym arqyly Qazaqstannyń quqyq qorǵaýshylaryna shyqtym. Barlyq máselelerdi talqylap aldyq. Barlyǵy men oılaǵannan qarapaıym bolyp shyqty.
Men Qazaqstanǵa keldim. Meni 23 shildede ustady, qazir men bostandyqtamyn. Eger eshqandaı qysym kórsetilmeıtinin bilgende erterek keler edim. Ábilıazovtyń isine qatysym bolǵanyna ókinemin. Men mamandyǵym boıynsha energetıkpin. Bankte 2007-2008 jyldary jumys jasaǵanmyn. Sosyn ketip qaldym. Bankke baǵynatyn kompanııalar men uıymdar kóp bolatyn. Shartty túrde qatysyp, qujattarǵa qol qoıyp júrdim. Nesıeler qalaı berilgenin bilmeımin», - dedi Qadesov.
«Men bul sheshimdi ózim, óz erkimmen qabyldadym. Buǵan ókinbeımin, tergeý jumystaryna kómektesýge daıynmyn. Ábilıazov isi boıynsha men sııaqty tyǵylyp júrgenderge aqylymdy aıtamyn», - dedi ol jýrnalısterge bergen suhbatynda.
Erjan Qadesov Ábilıazovtyń BTA bankiniń aqshalaryn urlaǵan kompanııalarynda jumys jasaǵan. Atalǵan joldar boıynsha Ábilıazovtyń ámirimen mıllıondaǵan aqsha qymqyrylǵan.
Banktiń burynǵy top menedjeri 2008 jyldan beri izdeýde bolǵan.
QR Sybaılas jemqorlyqqa qarsy Ulttyq bıýro taratqan málimetke sáıkes, 2009 jyly Qadesovqa syrtynan aıyp taǵylyp, halyqaralyq izdeý jarııalandy.
2016 jyldyń aqpanynda Qadesov Býdapeshtten tabylyp, ony vengr quqyq qorǵaý organdary qamaýǵa aldy. Shildede Qadesov Vengrııa sot organdary aldynda Qazaqstanǵa qaıtatynyn málimdedi.
Qazirgi tańda Qadesov óziniń kinásin tolyǵymen moıyndap otyr.
Ol Ábilıazovtyń BTA bankinen qalaı aqsha jymqyrǵany, qalaı ózine qarsy kýálik bermeý maqsatynda qyzmetkerlerin shetelge alyp ketkeni týraly egjeı-tegjeıli aıtyp berdi.
Sondaı-aq, Qadesov shetelde júrgende Ábilıazov pen onyń sybaılastary Qazaqstandaǵy ádiletsiz sot týraly qorqytyp otyrǵan.
Onyń túsiniktemeleri Ábilıazovtyń burynyraqta ustalǵan sybaılastarynyń «top menedjmentti Bishkek arqyly Reseı, Ýkraınaǵa qalaı alyp ketkeni týraly» aıtqandaryn tolyqtyra tústi.
Olardyń barlyǵyn Ábilıazov «Qazaqstanǵa barsańdar kúsh kórsetedi» dep úrkitip kelgen.
9 tamyzda kúdikti Qadesov tergeýge jumystaryna belsendi aralasqany úshin qamaýdan kepil arqyly bosatyldy.