Ábilıazovqa qatysty tergeý jumystary aıaqtaldy - Bas prokýratýra

ASTANA. QazAqparat - QR Bas prokýratýrasy «BTA banki» AQ basqarmasynyń burynǵy tóraǵasy E.Tátishovti óltirýdi uıymdastyrý faktisi boıynsha Muhtar Ábilıazovqa qatysty sotqa deıingi tergeý jumystaryn aıaqtady, dep habarlaıdy QazAqparat tilshisi atalǵan vedomstvoǵa silteme jasap.

«2018 jyldyń 17 tamyzynda Ábilıazovtiń áreketi QR Qylmystyq kodeksiniń 28-baby 3-tarmaǵy, 96 babynyń 2 tarmaǵy «j, z» tarmaqshalary boıynsha saralandy. Qazaqstan Respýblıkasynyń Bas prokýratýrasy Qylmystyq-protsestik kodeksiniń 294-babyna sáıkes, kúdikti Ábilıazov pen onyń qorǵaýshylaryna tergeý is-qımyldary óndirisiniń aıaqtalǵanyn jáne qylmystyq is materıaldarymen tanysýdyń bastalǵanyn habarlaıdy», - delingen taratylǵan aqparatta.

QR Qylmystyq-pprotsestik kodeksiniń 296-babyna sáıkes, kúdiktiniń nemese onyń qorǵaýshysynyń ótinýi boıynsha olar istiń materıaldarymen birge nemese bólek tanysa alady, kez kelgen málimetti jáne kez kelgen kólemde kóshirip alýǵa, memlekettik qupııalardy nemese zańmen qorǵalatyn ózge de qupııany qamtıtyn málimetterdi qospaǵanda, qujattardyń kóshirmelerin túsirip alýǵa, onyń ishinde ǵylymı-tehnıkalyq quraldardyń kómegimen túsirip alýǵa quqyly.

Qylmystyq is materıaldarymen tanysý Qazaqstan Respýblıkasy Bas prokýratýrasynyń  ókildik ǵımaratynda 2018 jylǵy 5 qyrkúıekte myna meken jaı boıynsha ótedi: Almaty qalasy, Bógenbaı batyr kóshesi 145 úı.