Ábilqasymova: 2021 jylǵy 1 qańtardan bastap mıkroqarjylyq qyzmetti lıtsenzııalaý engiziledi
«Memleket basshysy kredıttik uıymdardyń jaýapkershiligin arttyrý bóliginde, sondaı-aq kredıtter boıynsha shekti stavkalardy saralaý jáne tómendetý boıynsha qosymsha retteý sharalaryn qabyldaýdy tapsyrdy. Mıkroqarjylyq qyzmetti retteý tutynýshylardyń, ásirese tabysy tómen ári bank kredıtin ala almaıtyn azamattardyń quqyqtaryn qorǵaý úshin mańyzdy. Osy jylǵy 1 qańtardan bastap kredıttik seriktestikter, lombardtar jáne onlaın-kredıtteý kompanııalarynyń qyzmetin agenttik retteıdi. Memleket basshysynyń tapsyrmasy boıynsha bıyl lombardtardyń menshikti kapıtalyna qoıylatyn talaptar kúsheıtildi, basshylaryna qoıylatyn biliktilik talaptary jáne úı-jaılaryna tehnıkalyq talaptar belgilendi», - dedi ol.
Agenttiń tóraıymynyń aıtýynsha, barlyq banktik emes uıymdar esepke alynady. 1 qyrkúıektegi jaǵdaı boıynsha 3,1 myń mıkrokredıtteý sýbektisiniń ishinen 227 mıkroqarjy uıymy, 202 kredıttik seriktestik jáne 650 lombard eseptik tirkeýden ótti. Mıkrokredıtteýdiń qalǵan sýbektileri jumys istemeıdi nemese olardyń kapıtaly joq jáne olar qyzmetin toqtatýdy josparlap otyr.
«Azamattardy qorǵaý jáne mıkroqarjylandyrý naryǵynda alaıaq qaterin azaıtý úshin osy jylǵy 3 shildedegi zańǵa sáıkes 2021 jylǵy 1 qańtardan bastap mıkroqarjylyq qyzmetti lıtsenzııalaý engiziledi. Mıkroqarjylyq uıymdardy lıtsenzııalaýǵa ótý kapıtal men ótimdilik boıynsha prýdentsııalyq standarttardyń tolyq tizbesin, basshy qyzmetkerler men aktsıonerlerdiń iskerlik bedeline qoıylatyn biliktilik talaptaryn belgileýdi, sondaı-aq aýdıtke jáne eseptilikti usynýǵa qoıylatyn talaptardy kózdeıdi», - dedi Mádına Ábilqasymova.
Sonymen qatar onyń dereginshe, 30 naýryz ben 31 tamyz aralyǵynda 1 348 banktik emes uıymǵa tekserý júrgizildi. 144 uıymǵa qatysty 162 mln teńgege aıyppul salynyp, 122 jazbasha uıǵarym shyǵaryldy.
«Halyqtyń borysh júktemesiniń táýekelderin odan ári tómendetý úshin agenttik kredıttik uıymdardyń jaýapkershiligin arttyrý jáne kredıtter boıynsha syıaqynyń shekti stavkalaryn saralaý boıynsha sharalar qabyldaıdy», - dedi agenttik basshysy.