Ábilhan Amanquldyń aldaǵy qarsylasy anyqtaldy

ASTANA. QazAqparat - Qazaqstandyq Ábilhan Amanquldyń (2-0, 2 KO) kásipqoı bokstaǵy úshinshi jekpe-jegi qashan ótetini belgili boldy, dep habarlaıdy QazAqparat tilshisi.

Bul jóninde «Suleimen Promotions» baspasóz qyzmeti resmı túrde habarlady.

Jekpe-jek 15 sáýirde AQSh-tyń Kalıfornııa shtatyndaǵy Pomona qalasynda ótkiziledi. Kezdesý segiz raýndtyq jekpe-jekke belgilengen. Qarsylasy - ekinshi orta salmaqtaǵy boksshy meksıkalyq Danıel Echeverrıa (21-11, 18 KO).

Aıta ketsek, Ábilhan Amanqul byltyr qazan aıynda ótken jekpe-jeginde meksıkalyq taǵy bir boksshy Ieassona Pachekony (6-1, 3 KO) ekinshi raýndta nokaýtqa jiberdi.

Ábilhan Amanqul 1997 jyly 29 shildede dúnıege kelgen. Qazirge deıin áýesqoı boksta 2017 jyly álem chempıonatynda kúmis, Azııa chempıonatynda qola medal aldy.

Eske salsaq, budan buryn Jánibek Álimhanulynyń qarsylasy anyqtaldy.