Ábilázov qylmysyn jasyrý úshin óziniń qyzmetkerlerin kúshpen urlaǵan
«Men BTA bankte Muhtar Ábilázovpen birge jumys istedim. Onymen sonaý stýdenttik shaqtan tanys bolatynmyn. 2007 jyldyń kókteminde meni qarjy polıtsııasyna shaqyrdy. Sol shaqyrtýdan keıin BTA banktegi qujattarǵa qol qoıýdan bas tarttym. Alaıda, Ábilázovtiń ózi qarjy polıtsııasymen aradaǵy máseleni oń sheshetinin aıtyp, ýáde berdi. Ábilázov maǵan:«Budan bylaı qarjy polıtsııasyna barmaısyń!» dedi. Sol kezde men qorǵaýshynyń kómegine júgingim keldi. Ábilázovtan qorǵaýshynyń kómegin surap edim, ol qyzmettiń óte qymbat turatynyn jetkizdi. Amalym qalmaǵan soń, men óz qorǵaýshymdy ertip, qarjy polıtsııasyna bardym»,- dep áńgimeledi kýáger.
Sottaǵy sózinde Raýshan Qyzdarbekova osy oqıǵalardan keıin Muhtar Ábilázovpen arada eshqandaı qarym-qatynas bolmaǵanyn habarlady. Onyń aıtýynsha, Muhtar Ábilázov oǵan shetelge qashýǵa usynys jasaǵan. «2009 jyldyń naýryz aıynda maǵan shetelge ketýge usynys jasady. Biraq meniń ketýge oıym bolmaǵan. Meni kúshpen ketirmekshi boldy. Bul - Ábilázovtiń tapsyrmasy eken. Sol kezde ǵana aýrýhanadan shyqqan bolatynmyn. Jigitter kelip, meni kúshtep kólikke otyrǵyzyp, bir jaqqa alyp ketti. Ol Ábilázovtiń jigitteri bolatyn. Olar áýeli meni Qyrǵyzstannyń shekarasy arqyly áketpekke árekettendi. Odan túk shyqpady. Sebebi, ol jerde elden shyǵýǵa tyıym salynǵan edi. Sodan keıin Ózbekstan arqyly shyǵarmaqshy boldy, ol jerde de jol jabyq turdy»,- dep jalǵady sózin R. Qyzdarbekova. Óz sózinde kýáger Muhtar Ábilázovtiń ózine jáne áıeline telefon soqqanyn, biraq ekeýiniń de uıaly telefondary sónip turǵanyn habarlady.
Buǵan deıin málim bolǵanyndaı, Raýshan Qyzdarbekova BTA banktiń aqshasyn urlaýǵa qatysady. Atap aıtsaq, bul jerdegi áńgime «Seeria Alliance LTD»offshorlyq kompanııasyn zańsyz jolmen nesıeleý týraly bolyp otyr. BTA bankten bólingen qarajatqa atalǵan kompanııa jalpy quny 54,6 mln. AQSh dollary turatyn úsh áýe kemesin satyp alady. Ol ushaqtar lızıngtik kelisim-shart arqyly «Ekselent glaıd áýe kompanııasy» AQ-na beriledi. Іs júzinde atalǵan kompanııanyń qarjylyq jáne sharýashylyq qyzmetin Muhtar Ábilázov ózi baqylap otyrǵan.
Sonymen qatar, qashqyn bankırdiń tikeleı nusqaýymen bank pen «Ekselent glaıd áýe kompanııasy» AQ-nyń arasynda jalǵan kelisim-shart jasalady. Ol kelisim-shartta banktiń qyzmetkerlerin tasymaldaý jáne áýe reısterin uıymdastyrý boıynsha aqyly qyzmet túrlerin kórsetý jazylady. Osylaısha, saıyp kelgende atalǵan áýe kompanııasynyń esep-shotyna kelisim-sharttar boıynsha 2007 jyly - 922 mıllıon teńge, al 2008 jyly - 1 mıllıard teńgeden astam aqsha aýdarylady.
Aıta ketelik, qashqyn bankır Muhtar Ábilázovtiń qylmystyq isi boıynsha basty sot otyrysy aǵymdaǵy jyldyń 3-inshi sáýirinde bastaldy. Jalpy alǵanda, osy is boıynsha 200-den astam kýágerlerden sotta jaýap alý josparlanyp otyr.