Ábilázov «qashqyndarǵa» aı saıyn 10 myń AQSh dollaryn tólep otyrǵan
«Ábilázovpen men 1992 jyly tanystym, ol kezde kásipkerlikpen aınalysyp júrgen edim. Meni Almatyda Erjan Tátishev tanystyrdy. Tanysý formaldy jaǵdaıda ótti, odan ári men qatynas jasaǵan joqpyn. Tek Erjanmen jumys istedim. Alaıda keıinirek Muhtarmen ara-arasynda korporatıvtik sharalarda, jınalystarda kórisip turdym»,- dep bastady sózin sottalýshy.
Ol keıinirekte Muhtar Ábilázovpen «KEGOK» AQ-da birge jumys istegenin, biraq jaqyn aralaspaǵanyn aıtty. Alaıda 2003 jyly túrmeden shyqqan Ábilázov ony Máskeýdegi bıznesine tartady. «Ol maǵan ózi satyp alǵan «Krasnoıarkómir» kompanııasyn basqarýdy usyndy. Eger jumysta jaqsy nátıjege jetsem, menedjer retinde tabystyń 10 paıyzyn berýdi ýáde etti. Biraq ol ýáde oryndalmady»,- dedi J. Jarymbetov sottaǵy sózinde.
J. Jarymbetov banktegi birqatar bylyq-shylyqtardy ashyq aıtyp berdi. Máselen, býma-býma aqshalar qandaı da bir kelisim-shart boıynsha bankke túsip, basqa bir jaqtan bankten ketip jatty,- dedi ol. «Banktegi basqarýshylyq, baqylaýshylyq qyzmetterdi M. Ábilázov ózi atqardy. Mysaly, banktiń tıimdiligin arttyrý maqsatynda aktıvterdi ósirý kerek boldy. Bul Muhtardyń sheshimi edi. Menińshe, bul zańsyz áreket bolatyn. Túptep kelgende ashyq túrde jumys isteıtin kompanııalar evrobondtardy ornalastyrdy. Biz onyń esebin jarııaladyq. Eger bul esep-qısaptar jalǵan bolsa, halyqaralyq normalarǵa qaıshy keledi. Ár elde buǵan ártúrli jaza qoldanylady. Bul bylyqqa banktiń birinshi basshysy, aktsıonerleri, ıaǵnı, qujatqa qol qoıǵan Mámeshtegi men Ábilázovtiń ózi, sybaılastary jaýap beredi. Olardyń ishinde men de barmyn»,- dedi ol.
Atap aıtarlyǵy, sottalýshy J. Jarymbetov M. Ábilázovtiń ózge sybaılastarynyń betperdesin ashyp berdi. Mysaly, sottyń keshegi otyrysynda túsinik bergen Qaırat Sadyqovtyń bank kapıtalyn jasandy jolmen ulǵaıtý protsesin qadaǵalaǵanyn, osy mehanızmdi búge-shigesine deıin bilgenin áshkereledi.
«Ábilázov birde Erjan Tátishevtiń kýrstasy ári senimdi ókili bolǵan Merýert Jaqsylyqovamen kezdesti. Ol bankke qatysy bar barlyq kompanııalardyń esepshilik jáne saraptamalyq qujattaryn júrgizetin edi. Kezdesý mamyr aıynda Almatydaǵy dámhanalardyń birinde ótti. Sonyń nátıjesinde Ábilázov Sadyqovqa jáne basqalarǵa tıisti kepildikter berdi. 2005 jyly mamyr aıynda bank aktsıonerleriniń jınalysynda atalǵan adamdardyń barlyǵy Ábilázovtiń dırektorlar keńesiniń tóraǵasy bolýyn biraýyzdan jaqtap, daýys berdi. Tek Merýert Jaqsylyqova ǵana buǵan yqpal ete almady. Alaıda Ábilázov olardyń bárin banktegi jumysynda qaldyrdy. Alǵys esebinde atalǵan tulǵalarǵa, sonyń ishinde Sadyqovqa Ábilázov shamamen 100-200 myń AQSh dollary kóleminde bonýstar tóledi. Odan áride Sadyqov myrza basqarma múshelerimen birge bonýstar alyp turdy. Ol banktiń basqarma múshesi jáne dırektorlar keńesiniń de múshesi bolmasa da, osy bonýstardy aldy. Bonýstar qolma-qol aqsha túrinde tólendi»,- dedi ol.
J. Jarymbetovtyń aıtýynsha, Qaırat Sadyqovqa jalpy alǵanda 300 myń AQSh dollary kóleminde bonýstar tólengen. Aıtarlyǵy, shetelge qashqan M. Ábilázovtiń sybaılastary aı saıyn bankten 10 myń AQSh dollary (turǵyn úıleriniń jaldaý aqysyn qospaǵanda) kóleminde jalaqy alyp turǵan. «Barlyq qashqyndarǵa mundaı ótemaqy tóleý týraly sheshim Muratbek Ketebaevtyń usynysymen júzege asyryldy. Óıtkeni, ol «qashqyndarmen» tikeleı aınalysty. Ketebaevtyń ózi qashqyndardy «qolynda granatasy bar maımyldar» dep qaljyńdaıtyn-dy. Alaıda, 2012 jyly Ábilázov óz «qashqyndaryna» aı saıyn tólemaqy tóleýdi toqtatty. Olar óz mıssııasyn oryndap boldy dep uıǵarǵan shyǵar»,- dep jalǵastyrdy sottalýshy. Sondaı-aq, ol Sadyqovtyń Ábilázovpen «Skaıp» arqyly tikeleı baılanysqa shyǵyp otyrǵanyn aıtty. Ábilázov Sadyqovty Anglııadaǵy azamattyq protsesterine paıdalanǵan. Osy qyzmetine offshorlyq kompanııalardyń esebinen 300 myń AQSh dollary kóleminde syıaqy alǵan.
Ábilázovke adaldyǵy úshin Mámesh 10 mln AQSh dollaryn alǵan,- dep málimdedi sotta J. Jarymbetov. Onyń aıtýynsha, 1997 jyldan beri bankte jumys istep kelgen Sádýaqas Mámesh Erjan Tátishevtiń kazynashysy bolǵan.
«2005 jyly Ábilázov bankke kirgen soń, ol eń aldymen Mámeshpen senimdi qarym-qatynas ornatty. Ol qazynashy jáne basqarma tóraǵasy bolyp taǵaıyndaldy. Meniń bilýimshe, Mámesh Ábilázovtiń tapsyrmasy boıynsha 2005 jyly maýsym aıynda E. Tátishevtiń jesirine 90 mln. AQSh dollaryn tóledi. Osy «adaldyq qyzmeti» úshin Ábilázovten 10 mln. AQSh dollaryn aldy. Buǵan qosa banktiń basqa da basqarma músheleri sııaqty resmı jáne resmı emes bonýstar alyp turdy»,- dep túsindirdi ol. Aıtpaqshy, J. Jarymbetov bankte jumys istep júrgende aı saıyn 5-6 mln. teńge kóleminde jalaqy alǵanyn jasyrǵan joq.