Ábıba Ábýjaqynova: Basty maqsatym – Olımpıadanyń fınalyna jetip, altynǵa talasý

<p>ASTANA. KAZINFORM &mdash; Parıjde ótetin XXXIIІ Jazǵy Olımpıada oıyndaryna dzıýdodan Qazaqstan ulttyq qurama komandasynan 8 dzıýdoshy qatysady. Búgin olar Parıjge attanady.</p>

Atalǵan dodada qazaq jankúıerleri dzıýdodan erler arasynda Eldos Smetovqa úmit artsa, áıelder arasynda Ábıba Ábýjaqynovadan medal kútip otyrǵany anyq. Ábýjaqynova Olımpıadaǵa attanyp bara jatyp, Kazinform tilshisine eksklıýzıv suhbat berip, Olımpıada aldyndaǵy basty maqsatyn aıtyp berdi.

«Ár sportshynyń armany – Olımpıada altyny. Meniń de armanym sol altynǵa qol jetkizý. Fınalǵa deıin súrinbeı jetip, altynǵa talassam degen maqsatpen Parıjge attanyp bara jatyrmyn», - dedi sportshy.

Sonymen qatar Olımpıada aldyndaǵy oqý-jattyǵý jıyndary óte joǵary deńgeıde ótkenin, Olımpıadaǵa 100 paıyz daıyn ekenin de jasyrmady.

«Olımpıada aldyndaǵy oqý-jattyǵý jıyndary ózimniń oılaǵanymydaı ótti. Olımpıadaǵa 100 paıyz daıynmyn. Osyǵan deıingi qatysqan álemdik dodalarda júldesiz qaıtqan joqpyn. Bul joly da júldege qol jetkizý basty maqsatym. Men 27 shilde kúni áıelder arasynda birinshi bolyp, jarysqa shyǵamyn. Maǵan jankúıer bolyńyzdar», - dedi Ábıba Ábýjaqynova.

Esterińizge sala keteıik, dzıýdodan áıelder arasynda Ábıba Abýjaqynova (48 kg), Kamıla Berliqash (+78 kg), Esmıgúl Kýıýlova el namysyn qorǵaıdy.

Aıta keteıik, Qazaqstan quramasy Olımpıada oıyndaryna sporttyń 25 túrinen 92 joldama jeńip aldy.

Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵyna belgilengen.

Oıynǵa álemniń 205 elinen 10 500 sportshy qatysady.

Onda 32 sport túrinen 329 medal jıyntyǵy sarapqa salynady.