Ábıba Ábýjaqynova alǵash ret Grand Slam týrnıriniń kúmis júldesin ıelendi

<p>ASTANA. KAZINFORM &ndash; Dzıýdodan ulttyq qurama kóshbasshysy Ábıba Ábýjaqynova (-48 kg) Ózbekstan astanasy Tashkentte ótip jatqan Úlken dýlyǵa básekesinde kúmis medal jeńip aldy.</p>

Otandasymyz Ábıba ókinishke qaraı fınalda reseılik Sabına Gılııazovadan jeńilip qaldy. Bul – eki balýan arasyndaǵy ekinshi beldesý. Ázirge esep – 1-1. 

Osy salmaqtaǵy qola júlde Tara Babýlfat pen Týgche Bederge (Túrkııa) buıyrdy. 

Kúndizgi sessııada Ábýjaqynova jartylaı fınalda Tara Babýlfatty (Shvetsııa), shırek fınalda Marııa Selııa Labordeni (AQSh) utty. Al irikteýde Tamar Malka (Izraıl) men Gúzel ıAnamovanyń (Túrkmenstan) osal tusyn tapqan bolatyn. Osy salmaqtaǵy taǵy bir sportshymyz Ǵalııa Tynbaeva reseılik Sabına Gılııazovadan jeńildi.

Bul – qazaq dzıýdoshysynyń Úlken dýlyǵa sanatyndaǵy týrnırdegi alǵashqy kúmis medali. Ábıba osyǵan deıin Baký (2024 jyl), Tbılısı (2023 jyl), Parıj (2023 jyl), Abý-Dabı (2022 jyl) men Ulan-Batyr (2022 jyl) qalasyndaǵy Grand Slam-da qola júldege ıe bolǵan. Sondaı-aq ol osydan 2 jyl buryn Tashkent tatamılerinde álem chempıonatyndaǵy alǵashqy júldesin moınyna taqqan bolatyn. 

Esterińizge sala keteıik, osyǵan deıin erler arasynda Eldos Smetov jarysty shırek fınaldan aqtaǵanyn jazǵan bolatynbyz.