Abhazııadaǵy jaǵdaı: Bjanııa óz ornynda qaldy, oppozıtsııa parlamentke júginedi

<p>ASTANA. KAZINFORM &ndash; Abhazııa prezıdenti Aslan Bjanııa 15 qarashada bolǵan Sýhýmdaǵy oqıǵany memlekettik tóńkeris áreketi dep atady jáne ol eldiń prezıdenti bolyp qala beretinin basa aıtty. Bul týraly <a href="https://tass.ru/mezhdunarodnaya-panorama/22424977" target="_blank" rel="noopener">TASS</a> aqparat agenttigi jazdy.</p>

– Abhazııada úkimettik ǵımarattar kesheni mańyndaǵy tártipsizdikterden zardap shekkenderdiń sany 14 adamǵa jetti, - dep málimdedi «Apsnypress» agenttigi.

Abhazııa prezıdenti Aslan Bjanııa qarashanyń 15-i kúni Sýhýmda bolǵan sherýshiler qorshaýlardy buzyp ótip, aýmaqqa, odan keıin parlament, prezıdent ákimshiligi men úkimet ǵımarattaryna kirip ketken oqıǵany memlekettik tóńkeris jasaý áreketi dep atady. Sondaı-aq Bjanııa oppozıtsııanyń málimdemelerine qaramastan Abhazııa Respýblıkasynyń saılanǵan prezıdenti bolyp qala beretinin aıtty.

Ol Abhazııaǵa qazir Reseı Federatsııasymen ınvestıtsııalyq jobalar týraly kelisimge qaraǵanda kúrdeli jáne ózekti máselelerdi sheshý qajet ekenin atap ótti.

Oppozıtsııa talaptary

Abhazııadaǵy oppozıtsııa parlamentti jalǵyz zańdy memlekettik organ dep sanaıtynyn málimdedi. Bul týraly oppozıtsııalyq uıymdardyń ókili sanalatyn Saıası daǵdarysty eńserý jónindegi úılestirý keńesi málimdedi.

Oppozıtsııanyń pikirinshe, Abhazııa Respýblıkasynyń parlamenti jalǵyz zańdy memlekettik organ retinde respýblıkanyń búgini men bolashaǵy úshin tolyq jaýapkershilikti óz moınyna alýy kerek.

Investıtsııalyq kelisim týraly

30 qazanda Máskeýde Reseıdiń Ekonomıkalyq damý mınıstri Maksım Reshetnıkov pen Abhazııa premer-mınıstriniń orynbasary ári ekonomıka mınıstri Krıstına Ozgan reseılik kompanııalarǵa Abhazııada ınvestıtsııalyq jobalardy júzege asyrýǵa múmkindik beretin kelisimge qol qoıdy. Qujat taraptardyń quqyqtary men mindetterin aıqyndap, zańdy tulǵalardy qoldaý sharalaryn belgileıdi.

Oppozıtsııa jetekshileriniń biri, «Abhaz halyqtyq qozǵalysy» qoǵamdyq uıymynyń tóraǵasy Adgýr Ardzınba respýblıkada 2014 jyly qabyldanǵan ınvestıtsııalyq qyzmet týraly zań bar jáne onda ınvestorlarǵa kepildikter, arnaıy sharttar men jeńildikter qarastyrylǵanyn aıtty.

Onyń sózinshe, jańa kelisimde páterlerdi satýdy zańdastyrýdyń jasyryn túri qarastyrylǵan. 5 qarashada Sýhýmda respýblıkanyń qazirgi bıligine qarsy qoǵamdyq uıymdar kelisimdi Abhazııanyń ekonomıkalyq egemendigine destrýktıvti dep eseptep, ony ratıfıkatsııalaýǵa qarsy shtab qurdy.

Aqparatty «QazAqparat» agenttigine seriktes TASS agenttigi taratty.