Ábdirov: Konstıtýtsııalyq baqylaýdyń jańa baǵyty zańdar sapasyna jaqsy áser etedi
Búgin Parlament Palatalarynyń birlesken otyrysynda «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» QR Zańynyń jobasyn ekinshi oqylymda talqylaý barysynda depýtat Nurlan Ábdirov osylaı málim etti, dep habarlaıdy QazAqparat.
«Memleket basshysy usynǵan konstıtýtsııalyq reforma barynsha der kezinde qolǵa alyndy ári asa qajettilikten týyndap otyr. Ony iske asyrý úshin bizde barlyq qajetti zııatkerlik jáne resýrstyq áleýet jetkilikti. Memleket basshysy usynyp otyrǵan zań jobasy Konstıtýtsııanyń 19 babyna 26 túzetý engizýdi kózdeıdi»,-dedi zań jobasyn qaraý jónindegi Parlament Palatalarynyń birlesken komıssııasy tóraǵasy, depýtat Nurlan Ábdirov.
Osy oraıda ol túzetýlerdiń basym blogy Prezıdenttiń, Parlament pen Úkimettiń bılik ókilettikterin qaıta bólý máselelerin qozǵaıtynyn atap ótti. Bul túzetýler Elbasynyń «100 naqty qadam» Ult josparyn iske asyrýǵa baǵyttalǵan.
«Prezıdenttiń qorǵanys qabilettiligi, ishki saıasat, memlekettik basqarý, Konstıtýtsııany qorǵaý jáne memlekettik bılik tarmaqtarynyń tıimdi jumysy men olardyń ózara is-qımylyn qamtamasyz etý máseleleri jónindegi quzyretin saqtaý durys qadam bolǵany kúmánsiz»,-dedi depýtat.
Atap aıtqanda, Parlament zań shyǵarý bıligin júzege asyratyny týraly norma bekitiledi. Memleket basshysynyń áleýmettik-ekonomıkalyq saladaǵy zańmen belgilengen ókilettikteriniń basym bóligin Úkimetke berý usynyldy. Túzetýler sondaı-aq bılik tarmaqtary arasyndaǵy qarym-qatynasty konstıtýtsııalyq deńgeıde teńgerimdi etý mindetin sheshedi.
«Adamnyń jáne azamattyń konstıtýtsııalyq quqyqtary men bostandyqtaryn qorǵaýdyń jańa pármendi tetigi paıda boldy. Negizgi Zańǵa sáıkes, Qazaqstan Respýblıkasynda adamnyń jáne azamattyń quqyqtary men bostandyqtary tanylyp qana qoımaı, olarǵa kepildik beriledi. Bul rette Qazaqstan Respýblıkasynyń Prezıdenti oǵan kepil bolyp tabylady. Memleket konstıtýtsııalyq quqyqtar men bostandyqtardy qamtamasyz etý jónindegi mindettemelerdi qabyldaı otyryp, ony júzege asyrýdyń quqyqtyq, eń aldymen, konstıtýtsııalyq tetikterin belgileıdi. Máselen, Memleket basshysy osylardy qorǵaý múddesinde Konstıtýtsııalyq keńeske qoldanystaǵy jáne qabyldanǵan zańdardyń, sondaı-aq ózge de quqyqtyq aktilerdiń Konstıtýtsııaǵa sáıkestigin tekserý úshin júgine alady. Osyndaı konstıtýtsııalyq baqylaýdyń jańa baǵyty zańdar men quqyqtyq aktilerdiń sapasyna jaqsy áser etetini sózsiz. Al bul bolsa, Qazaqstannyń quqyqtyq memleket retinde odan ári nyǵaıýyna yqpal etetin bolady»,-dedi N. Ábdirov.
Aıta keteıik, búgin QR Parlamenti palatalarynyń birlesken otyrysynda «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» zań jobasy ekinshi oqylymda qabyldandy .