Ábdiqalyqova Djekson-Venık zańyna túzetýlerdi boldyrmaýdy qoldaǵan Rýbınge rızashylyq bildirdi

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqova Eýrazııadaǵy evreı qaýymyn qoldaý ulttyq  koalıtsııasynyń tóraǵasy Danıel Rýbınmen kezdesti, dep habarlaıdy QazAqparat.

«Aǵymdaǵy jyly Qazaqstan men AQSh-tyń arasyndaǵy dıplomatııalyq qarym-qatynasqa 25 jyl toldy. Biz atalǵan datanyń aıasynda Vashıngtonda, sonymen qatar Astanada óte kóp shara ótkizdik. Nazarbaev ortalyǵy uıymdastyrǵan úlken sharaǵa qatysyp, onda  osy 25 jyldyń ishindegi jetistikterimizdi atap óttik. Qazirgi ýaqytta belsendi dıalog júrgizilýde. Elbasy Nursultan Nazarbaev pen Tramp túrli alańdarda birneshe ret kezdesip, telefon arqyly kelissózder júrgizdi»,-  dep atap ótti Memlekettik hatshy.

Gúlshara Ábdiqalyqova  búgingi kúni Qazaqstan damýdyń jańa kezeńine aıaq basqanyn da atap ótti. Bıyl birqatar jańa qujattardyń qabyldanǵanyn jáne  reformalardy júzege asyrý bastalǵanyn aıtty.

«Birinshisi ekonomıka ósimin jańa tehnologııalar men ınnovatsııalardy engizý arqyly ósirýge baǵyttalǵan Qazaqstannyń  úshinshi jańǵyrýy dep atalady. Ekinshisi, bizde rýhanı damý salasynda jańǵyrý júrgizilýde. Qazirgi ýaqytta elde dástúrdi, mádenıetti, bizdiń eń basty jetistigimiz sanalatyn qoǵamdyq kelisimdi saqtaı otyryp, jahandyq álemge kirigýge baǵyttalǵan jumystar oryn alýda», - dedi ol.

Memlekettik hatshy elimizde konstıtýtsııalyq reforma  júzege asyrylyp, onyń nátıjesinde Úkimettiń jaýapkershiligi keńeıtilip, Parlamenttiń quzireti arttyrylǵandyǵyn, Prezıdenttiń birqatar quzireti Úkimet pen Parlamentke berilgendigin aıtty.  Sonymen qatar Qazaqstan halqy Assambleıasynyń jumysy jaıynda keńinen aıtyp berdi.

«Rýbın myrza, AQSh Kongresi palatasyna Djekson-Venık zańyna túzetýlerdi boldyrmaý týraly zań jobasyn qoldaý jónindegi ótinishpen júgingenińiz úshin rızashylyǵymdy bildiremin», - dedi Gúlshara Ábdiqalyqova

Onyń dereginshe, 2009 jyly júrgizilgen halyq sanaǵyna sáıkes respýblıkada 3485 evreı turyp jatyr. Evreı  dıasporasy eldegi basqa da etnostar sekildi óz dini men dástúrin emin-erkin ustanýda. 1992 jyldan beri 20 etnomádenı birlestikti, qaıyrymdylyq maqsattaǵy 13 hesedti jáne 13 qaýymdyq ortalyqty qamtıtyn evreı ulttyq uıymdarynyń «Mıtsva» qaýymdastyǵy jumys isteýde.