Abaıdyń «Tolyq adam» iliminiń jol kartasyn jasaýymyz kerek – Orazaly Sábdenov
Ǵalymnyń aıtýynsha, Prezıdent joldaýynda ult sapasyn arttyrýdy mindettep otyr.
«Qasań sana psıhologııasynan arylý, jańa bilim qajet degen sóz adamı ıntellektýaldyq qundylyqtardy damytýdan shyǵady. Búkil ekonomıka ulttyq ıdeıamen boljanady. Biz 30 jyl boıy bir úrdispen júrdik. Munaı-gaz ekonomıkasyna sendik. Basqarý tásili joǵarydan tómen boldy. Keıde biz ózimiz ózimizdi basqarýdy ıgermeı jatyp, basqany basqarǵymyz keldi. Bul da Abaı sózi. Bizde jergilikti ózin-ózi basqarý týraly zańy joq. Parlamentte 4 ret depýtat boldym. Osy máseleni birneshe ret kóterdim. Nátıje bolmady. Aýylda jergilikti ákimderdi endi halyq saılamaqshy. Osylaısha ózin ózi basqarý kele jatyr. Jańa ıdeologııamen ult sapasyn arttyrýǵa qoǵamdyq ǵalymdar at salysýy kerek. Álemniń damýy shyǵysqa aýyp jatyr. Qytaı, Malaızııa, Sıngapýr, Japonııa memleketteri qaryshtap damıdy. Bul máseleniń barlyǵy shyǵys fılosofııasyna aýysady degen sóz. Ál-Farabı, Abaı, Laotszy, Konfýtsıı, Býdda tur. Álemde qazir qarjy salasy birinshi degen adamdar shatasady. Máseleniń barlyǵy rýhanı daǵdarystan bastaldy. Biz Abaıdy tolyq iske asyra almaı jatyrmyz. Abaıdyń «Tolyq adam» iliminiń jol kartasyn jasap, bizdiń rýhanı konstıtýtsııamyz retinde qalyptastyrý kerek. Sondyqtan, Qytaı memleketi sııaqty bizde de ıdeologııa kúshti bolý kerek edi», - dedi O.Sábdenov.
Ǵalym bizde de Qytaıdaǵydaı qoǵamdyq ǵylymdar akademııasy qurylýy kerek dep sanaıdy.
«Akademııanyń eki mindeti bolýy kerek. Biri – fýndamentaldy, ǵylymı izdenis bolsa, ekinshisi - Qazaqstan jańa ıdeologııasyn qalyptastyrý bolýy tıis. Ashyǵyn aıtý kerek, osy jerde bir kenje qalyp otyrmyz. Osy usynysym Prezıdentke jetse jaqsy bolar edi», - dedi ol.