Abaıdyń shetel tilindegi shyǵarmalary ár oblys ortalyǵyndaǵy kitaphanaǵa qoıylady

NUR-SULTAN. QazAqparat - Abaı shyǵarmalary jınaǵynyń shet tiline aýdarylǵan nusqasy barlyq oblystaǵy ortalyq kitaphanada bolady. Bul týraly Ortalyq kommýnıkatsııalar qyzmetinde ótken baspasóz konferentsııasynda QR Mádenıet jáne sport vıtse-mınıstri Nurǵısa Dáýeshov aıtty, dep habarlaıdy QazAqparat tilshisi.

Abaıdyń 175 jyldyq mereıtoıyna arnalǵan mańyzdy jobalardyń biri - shyǵarmalar jınaǵyn sheteldiń 10 tiline aýdarý jáne shyǵarý.

«Abaıdyń shet tiline aýdarylǵan jınaqtary oblys ortalyqtary men respýblıka kólemindegi barlyq kitaphanalarda turatyn bolady. Shet tiline aýdarylǵan jınaqtardy halyqqa kórsetý maqsatynda jumystary júrgiziledi », - deıdi Nurǵısa Dáýeshov.

Ol jınaqtardyń elektrondy nusqasyn shyǵarý jaıy da eskerilgen.

«Shet tiline aýdarylǵan jınaqtar qaǵaz kúıinde de, elektrondy nusqada da bolady. Ony belgili bir ınternet resýrstarǵa salyp, jastardyń aqyn shyǵarmalarymen tanysýyna jaǵdaı jasaımyz», - dedi ol.

Eske sala ketsek, byltyr 26 tamyzda QR Prezıdenti Qasym-Jomart Toqaevtyń jarlyǵymen Abaıdyń 175 jyldyq mereıtoıyn daıyndaý jáne ótkizý jónindegi memlekettik komıssııanyń quramy bekitilgen bolatyn.

Jospar 82 tarmaqty qamtıdy, solardyń ishinde iri halyqaralyq jáne respýblıkalyq qoǵamdyq mańyzy bar, ǵylymı, aǵartýshylyq is-sharalar, konferentsııalar, sımpozıýmdar, dóńgelek ústelder, synyp saǵattar, poetıkalyq jáne ádebı konkýrstar, baspasóz týrlary jáne ózge de is-sharalar bar.