Abaıdyń nemere týysy Manataı aqsaqal: Óskeleń urpaq úshin tańdaý jasadym
Abaı aýdanynda turatyn 85 jastaǵy aqsaqal saılaý ýchaskesine kelip, óz tańdaýyn jasady.
«Saılaýda daýys berip, jastarǵa úlgi kórsetý – bizge paryz dep esepteımin. Sebebi jastardy patrıottyq pen jaýapkershilikke tárbıeleýimiz kerek. Eldiń keleshegi úshin bárimiz de jaýaptymyz. Búgin óskeleń urpaqtyń bolashaǵy úshin óz tańdaýymdy jasadym. Qazaqstannyń órkendep, damyǵan elderdiń qataryna qosylýyn tileımin», - deıdi qarııa.
Aıta keteıik, Manataı Baltaqaıuly qazaqtyń tuńǵysh kásibı skrıpkashysy Aıtkesh Tolǵanbaevtyń «Qatal taǵdyr tálkegi» atty ómirbaıandyq kitabyn orysshadan qazaq tiline aýdarǵan. Oblystyq jáne aýdandyq gazetterde týǵan ólkeniń tarıhy men tuǵyry bıik tulǵalary týraly talaı maqala jarııalady.
Uzaq jyldyq eńbegi elenip, «Eren eńbegi úshin», «V.I.Lenın týǵanyna 100 jyl tolýyna oraı», «Eńbektegi erligi úshin», «Tyń jerlerdi ıgergeni úshin», «Eńbek ardageri» syndy marapattardyń ıegeri. Eki ul, úsh qyz tárbıelegen aqsaqal alty nemeresiniń qyzyǵyn kórip otyr.