Abaıdyń «Qara sózderi»‎ cheh tilinde jaryq kórdi

NUR-SULTAN. QazAqparat - Abaı Qunanbaıulynyń 175 jyldyǵyn merekeleý aıasynda Qazaqstan Elshiligi QR Ulttyq akademııalyq kitaphanasymen birlesip uly aqyn men aǵartýshynyń cheh tiline aýdarylǵan «Qara sózderi» kitabynyń onlaın tanystyrylymyn ótkizdi, dep habarlaıdy QR SІM baspasóz qyzmeti.

Іs-sharaǵa Qazaqstan men Chehııanyń belgili qoǵam qaıratkerleri, ǵylymı toptary men buqaralyq aqparat quraldarynyń ókilderi qatysty.

Qazaqstandyq dıplomattar búginde Qazaqstan Táýelsizdiktiń 30 jyldyǵy qarsańynda turǵan kezde uly Abaıdyń sózderi erekshe mánge ıe bolatynyn atap ótti.

Chehııanyń «Azııa dostary tobynyń» jetekshisi, professor, fılosofııa ǵylymdarynyń doktory Irjı Shıma kitaptyń jaryq kórýi cheh jurtshylyǵyna álemdik ádebıettiń damýy men qalyptasýyna ólsheýsiz úles qosqan dara aqynynyń shyǵarmashylyǵymen tanysýǵa múmkindik beretinine senim bildirdi.

Karlov ýnıversıtetiniń professory Tomash Kýchera óz sózinde: «Qazaqtyń oıshyly jáne aqyny Abaı Qunanbaıulynyń kitaby teńdesi joq basylym. Ol cheh oqyrmandaryna qazaq halqynyń tarıhy men dástúrin tereńirek túsinýge múmkindik beretinine jáne bizdiń mádenıetterimizdi jaqyndastyratynyna kámil senemiz sózsiz».

Cheh buqaralyq aqparat quraldary ókilderiniń sózderi de qyzyǵýshylyqpen tyńdaldy.

Qazaqstandyq taraptan prezentatsııaǵa beıne baılanys arqyly «Qazaqstan Jazýshylar odaǵynyń» tóraǵasy, aqyn Ulyqbek Esdáýlet, QR eńbegi sińgen qaıratkeri, M.Áýezov atyndaǵy ádebıet jáne óner ınstıtýtynyń dırektory Kenjehan Mamytjanov, QR Ulttyq akademııalyq kitaphanasynyń bas dırektorynyń orynbasary Álııa Qojabekova qatysty.

Cheh tiline aýdarylǵan Abaıdyń «Qara sózderin» Qazaqstan Elshiligi Pragadaǵy bilim berý mekemeleriniń kitaphana qorlaryna jiberedi.