Abaıdyń atyn qalaǵa bere almaı júrgende tutas bir oblys aqyn esimin ıelendi - Qazybek Isa
Depýtattyń aıtýynsha, Memleket basshysy málimdegen «Jańa Qazaqstandy» qurýǵa naqty qadam jasaldy dep nyq senimmen aıtýǵa bolady.
«Budan bylaı Prezıdent eshqandaı partııa múshesi bolmaıdy. Ákimder men olardyń orynbasarlaryna partııa fılıaldaryn basqarýǵa tyıym salynady. Parlamentke endi eshqandaı partııada joq halyq ókilderi de saılana alady. Ár aımaqtan Májiliske bir-bir ókil saılana alady. Parlament saılaýy 70 paıyz - proportsıonaldyq, 30 paıyz - majorıtarlyq júıemen saılanady. Parlamenttiń ókilettigi kúsheıedi. Partııa qurý úshin burynǵy mejeden 4 ese az 5 myń múshe jetkilikti bolady. Bul parlamenttegi partııalar sanyn kóbeıtedi. Konstıtýtsııalyq sot qaıta qurylady»,- dep jazdy depýtat.
Sondaı-aq ol jańa oblystardyń ashylýymen quttyqtady.
Prezıdent joldaýynda «Aq jol» partııasynyń baǵdarlamasyndaǵy usynystardyń basym bóligi oryndalyp jatqanyna qýanyshty ekenin jetkizdi.
«Mysaly, Parlamenttiń ókilettigin keńeıtý, Prezıdenttiń partııada bolmaýy, ákimderdiń partııa fılıaldaryn basqarmaýy jáne Semeıdi qaıta oblys etip ashý nemese jeke statýs berý týraly partııa tóraǵasy, Májilis depýtaty Azat Perýashev parlamentte talaı kótergen bolatyn. Biz úsh-tórt jyl buryn Semeı qalasyna Abaıdyń atyn berý kerek dep jazǵanymyzda kópshiligi qoldaǵanmen, qarsy shyqqandar da bolyp edi. Mine, endi qala túgili oblysqa berildi Uly Abaıdyń aty. Parlamentte halyq múddesin qorǵap kele jatqan «Aq jol» partııasy saıası baǵdarlamasynyń basym bóligi Prezıdent Joldaýynda qoldaý taýyp, iske asyp jatqany úshin halyqqa da, qurylǵanyna búgin 20 jyl tolyp jatqan partııamyzǵa da zor tartý dep bilemiz. Iá, Jańa dáýirdi jasaýǵa bárimiz óz úlesimizdi qosýymyz kerek»,- dep jazdy Qazybek Isa.