Abaıdyń 50-den asa óleńin jatqa aıtqan oqýshy baıqaý jeńimpazy atandy

PAVLODAR. QazAqparat - Pavlodar qalasynyń № 22 jalpy orta bilim berý mektebinde Abaı oqýlarynyń qalalyq kezeńi ótti, dep habarlaıdy pavlodarnews.kz.

 Baıqaýdyń maqsaty - mektep oqýshylary arasynda Abaı men Shákárim shyǵarmalaryn nasıhattaý, ulylar poezııasyna, rýhanı murasyna degen súıispenshilikke tárbıeleý. Oǵan 32 jalpy orta bilim berý qala mektepterinen 5-11 synyptardan 93 oqýshy qatysty. Jetkinshekter tórt baǵyt boıynsha synǵa tústi: «Óleń - sózdiń patshasy, sóz sarasy» nomınatsııasy - Abaı jáne Shákárim shyǵarmalaryn jatqa oqý, «Kóńilim ándi uǵady» nomınatsııasy - ánder men kúıler oryndaý, «Júırikten júırik ozar jarysqanda» nomınatsııasy - jas daryndar konkýrsy jáne «Ulylar álemi» nomınatsııasy - esse jazý.

 Qazylar alqasynyń sheshimimen № 7 mekteptiń 7-synyp oqýshysy Arýjan Esjanova, № 29 mekteptiń 6-synyp oqýshysy Ádil Bekimurat, №12 mekteptiń 9-synyp oqýshysy Nurbek Káribaı jáne № 20 lıtseı-mektebiniń 9-synyp oqýshysy Tórehan Tókenov tórt atalym boıynsha birinshi oryndy ıelendi. Arýjan uly aqyn Abaıdyń 50-den asa óleńin jatqa bilse, jas vokalıst Ádil «Kózimniń qarasy» ánin oryndap, kórermenderdi óziniń ádemi daýysymen baýrap aldy. Sondaı-aq Nurbek ózi shyǵarǵan «Abaıdy eske alý» óleńimen Abaıdyń shyǵarmashylyǵyna degen súıispenshiligin kórsetti.

 Qalalyq kezeńniń jeńimpazdary 6-naýryzda 2018 jyly oblystyq kezeńge qatysady.  

Foto: pavlodarnews.kz