Abaıdyń 1909 jyly jaryq kórgen kitaby qaıta qalpyna keltirildi
Qundy jınaqty Semeı qalasynyń aımaqtyq kommýnıkatsııalar qyzmetinde ótken baspasóz-konferentsııasynda Abaı mýzeıiniń ókilderi tanystyrdy.
«1909 jyly hakim qaıtys bolǵannan keıin onyń alǵashqy jınaǵy basylyp shyqqan edi. Kitaptyń jaryq kórýine onyń uly Turaǵuldyń, nemere inisi Káketaıdyń jáne «Alash» qozǵalysynyń jetekshisi Álıhan Bókeıhannyń úlesi zor bolǵan. Jınaq Nur-Sultan qalasyndaǵy qoljazbalar jáne sırek kezdesetin kitaptardyń ulttyq ortalyǵynda qaıta qalpyna keltirildi. Ortalyq mamandary Semeıge kelgende, bizdiń mýzeıde biregeı jınaqtyń bar ekenin bilip, ony restavratsııalaý týraly sheshim qabyldady. Osyǵan deıin kitaptyń muqabasy bolmaı, ári biraz betteri jyrtylǵan edi. Qazir jańartylǵan jınaq mýzeıge oraldy», - dedi mýzeı dırektorynyń orynbasary Meıramgúl Qaırambaeva.
Kitap 120 betten turady. «Halyq týraly», «Mahabbat týraly» syndy bólimderge bólingen.
Jınaqqa Abaıdyń júzge jýyq shyǵarmasy engen.