Abaıdyń 175 jyldyq mereıtoıyna qansha qarjy jumsalady

NUR-SULTAN. QazAqparat - Bıyl Abaıdyń 175 jyldyq mereıtoıy QR Mádenıet jáne sport mınıstrligi jyl saıyn bóletin qarajat aıasynda toılanady. Bul týraly Ortalyq kommýnıkatsııalar qyzmetinde ótken baspasóz konferentsııasynda QR Mádenıet jáne sport vıtse-mınıstri Nurǵısa Dáýeshov aıtty, dep habarlaıdy QazAqparat tilshisi.

«Abaıdyń 175 jyldyq mereıtoıyna arnalǵan sharalar QR Mádenıet jáne sport mınıstrliginiń 3 mlrd teńge kólemindegi jyldyq josparlanǵan qarjysy esebinen ótedi. Mysaly, Abaı atyndaǵy Opera jáne balet teatry gastroldik saparlaryna bólingen jyl saıynǵy qarjyny Abaı jylyna arnap, Máskeý, Túrkııa, Qytaıǵa baryp óner kórsetedi», - deıdi Nurǵısa Dáýeshov.

Mereıtoı aıasynda Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵyn túrlendirý jáne aqyn esimimen baılanysty tarıhı-mádenı mura obektilerine ǵylymı-restavratsııalaý jumystaryn júrgizý qarastyrylǵan.

«Bul jumystardyń bári «Qazrestavratsııa» uıymyna bólingen qarajat esebinen jasalady. Mysaly, Abaıdyń Semeı qalasyndaǵy mýzeıiniń ishki jóndeý jumystaryna 30 mln teńge bólindi», - deıdi Nurǵısa Dáýeshov.

Uly Abaı mereıtoıynyń resmı saltanatty ashylý rásimi 21 qańtar kúni Nur-Sultan qalasynda ótedi.