Abaıdyń 175 jyldyǵy: Almatyda jastar zııatkerlik kvestke qatysty

ALMATY. QazAqparat – Búgin Almatyda Respýblıka saraıynda ǵulama aqynnyń ómiri men shyǵarmashylyǵyna arnalǵan «Abaı álemdik ǵajaıyp tulǵa» atty ádebı sazdy kesh ótti, dep habarlaıdy QazAqparat tilshisi.

Kórmede hakim Abaıdyń ár túrli lırıkalar jáne satıralyq óleńderi, peızajdyq eskızderi, «Qara sózderi», orys jáne sheteldik avtorlardyń aýdarmalary qoıyldy.

Sonymen qatar, kópshiliktiń nazaryna Abaıdyń dombyrasynyń túpnusqasy usynyldy. Kóne jádiger Yqylas atyndaǵy halyq mýzykalyq aspaptary mýzeıinen jetkizilgen.

Poezııa áýesqoılaryna «Poetıkalyq mıkrofon: poezııa - tildiń bıleýshisi» alańynda «Almaty qalasy Ortalyqtandyrylǵan kitaphana júıesiniń» oqyrmandary men tanymal aqyndar Abaıdyń óleńderin oqydy.

Medeý aýdanynda ornalasqan mádenı uıymdardyń ókilderi ánshiler, aqyndar, akterler Abaı muralarynan án-kúıden shashý shashyp, qoıylym kórsetti.

Stýdentter, mektep oqýshylary oıyn alańyna «Abaıdyń shyǵarmalaryn bilesiz be?» zııatkerlik kvestine qatysty.

Abaı poezııasyn súıetinder úshin belgili aqyndar men jazýshylardyń qatysýymen «Uly murany saqtaý» master-klasy jáne qolóner sheberleriniń kórmesi uıymdastyryldy.

«Adamzattyń alyby – hakim Abaıdyń týǵanyna 175 jyl tolýyna oraı elimizde Memleket basshysy jarlyǵymen Abaıdyń 175 jyldyǵyn respýblıkalyq kólemde keń aýqymda merekeleý qolǵa alyndy. QR Memleket basshysy aıtpaqshy, bul toılaý úshin emes rýhanı jańǵyrý úshin jasalyp jatyr. Soǵan baılanysty Respýblıka saraıynyń kireberisinde «Abaı álemi» atty ádebı sazdy kesh ótkizip jatyrmyz. Sahnada «Alataý» dástúrli teatr oryndaýynda Abaı ánderine arnalǵan arnaıy qoıylym qoıyldy. Abaı rólin akterler sahnalap jatyr», - dedi Medeý aýdandyq Mádenıet jáne tilderdi damytý basqarmasynyń basshysy Sáken Aralbaev.

Merekelik kesh sońynda 40 jýyq Abaıdyń urpaǵy «Kózimniń qarasy» ánin hormen oryndady. Ádebı sazdy kesh fleshmobpen aıaqtaldy.