Abaıdy bir roman tóńireginde ǵana bilip keldik – Erlan Sydyqov
Ýnıversıtet rektory Erlan Sydyqov osy maqala arqyly uly aqynnyń 175 jyldyq mereıtoıyna jan-jaqty daıyndyq bastalǵanyn atap ótti.
«Maqala qarapaıym tilmen jazylsa da, onda tereń oılar men baǵyttar usynylǵan. Ókinishke qaraı, biz osy kúnge deıin Abaıǵa tereń boılaı almaı kelemiz. Ásirese, sovet zamanynda Abaıdy halyqqa jaqyndatqan joq. Onyń poezııasyn ǵana usyndy. Onyń ózinde de din, musylmandyq, bılik, baılyq týraly aıtqan óleńderi men sózderin jetkizbedi. Aınalyp kelgende, Abaıdyń ǵylymı bıografııasyn jazýǵa da múmkindik berilmedi. Onyń barlyǵy Muhtar Áýezovtyń «Abaı joly» epopeıasynyń alǵashqy nusqalarynyń ózin shyǵarmaı, ıdeıany taptyq-partııalyq prıntsıp tóńiregine ákelmeıinshe qabyldaǵan joq. Biz Abaıdy sol roman tóńireginde ǵana bilip júrdik», - dedi Erlan Sydyqov EUÝ-da ótken jınalysta.
Onyń aıtýynsha, jańa zamandaǵy, táýelsiz Qazaqstandaǵy jańa urpaq tolassyz aqparat dáýirinde ómir súrip jatyr.
«Qazir jan-jaqtan kelip túsken aqparat legin eshkim toqtata almaıdy. Júregimizge de, sanamyzǵa da, mıymyzǵa da kelip jatyr. Osy turǵyda ásirese jastar qandaı baǵyt ustaýy kerek? El bolyp qalamyz ba? Eldik qasıetterimizdi saqtaı alamyz ba? Ult bolyp uıımyz ba? Tilimizdi, dilimizdi saqtaı alamyz ba? Álde syrttan kelgen dúdámal qundylyqtarǵa erip ketemiz be? Túptep kelgende qazaq bolyp qalamyz ba, joq pa? Mine, keshe shyqqan maqalanyń negizgi oı-baǵyty, kontseptýaldy tujyrymy «Bizge baǵyt berýshi kim?» degenge jaýap berip otyr. Ol – uly Abaı. Abaıǵa qaıtadan keleıik, jańasha keleıik, Abaıdyń qyzmeti men ómirine kóńil bóleıik. Sol arqyly ózimizdiń jolymyzdy anyqtaıyq. Osylaısha, uly Abaıdyń bizgen shyraq ekenin, jol kórsetýshi baǵyt berýshi ekendigin osy maqala meńzep otyr. Olaı bolsa, Abaıǵa biz kerek emes shyǵarmyz, bizge Abaı kerek. Óziniń kezekti mereıtoıymen Abaı bizge taǵy bir múmkindik berip otyr. Osy maqala arqyly Abaıǵa taǵy zer salyp, boıtumar etip ustap, ómirlik standartymyzǵa aınaldyraıyq», - dedi rektor.