«Abaı jolyn» oqý marafony EUÝ rektorynan Dımash Qudaıbergen men Serik Sápıevke joldandy

NUR-SULTAN. QazAqparat – L.N.Gýmılev atyndaǵy Eýrazııa ulttyq ýnıversıtetinde Muhtar Áýezovtiń «Abaı joly» epopeıasyn oqýǵa arnalǵan ádebı marafon bastaldy, dep habarlaıdy QazAqparat.

Marafon Abaı Qunanbaıulynyń 175 jyldyq mereıtoıy aıasynda ýnıversıtette ótken «Biz Abaı jolyndamyz» atty jıynda málim boldy.

«Sharada EUÝ jaratylystaný ǵylymdary fakýltetiniń 3-kýrs stýdenti, «Qamqor» eriktiler qozǵalysynyń múshesi Dıana Saılaýbaeva Eýrazııa ulttyq ýnıversıtetiniń rektory Erlan Sydyqovqa usynys jasap, Muhtar Áýezovtiń «Abaı joly» epopeıasynan úzindi oqýdy ótindi. Rektor Erlan Báttashuly stýdent usynysyn qabyl alyp, ádebı marafondy ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov pen álemge tanymal ánshi Dımash Qudaıbergenovke, QR mádenıet jáne sport mınıstrliginiń Sport jáne dene shynyqtyrý komıtetiniń tóraǵasy, Olımpıada chempıony Serik Sápıevke joldady», - dep habarlady ýnıversıtettiń baspasóz qyzmeti.

Aýqymdy marafonǵa L.N. Gýmılev atyndaǵy Eýrazııa ulttyq ýnıversıtetiniń jıyrma myńnan asa stýdentteri men eki myńǵa jýyq professor-oqytýshylary jáne sala qyzmetkerleri qosylǵan.

«Sondaı-aq, bul sharaǵa bizdiń Qazaqstannyń eń alys túkpirindegi oqyrmandar men shetelde turatyn qandastarymyz da belsene qatysady degen senimdemiz», - deıdi ýnıversıtet ókilderi.

Eske sala ketsek, bıyl Abaı Qunanbaıulynyń 175 jyldyq mereıtoıy toılanady.

10 qańtarda Prezıdent Qasym-Jomart Toqaevtyń «Abaı jáne XXI ǵasyrdaǵy Qazaqstan» maqalasy jaryq kórgen edi.