«Abaı jastary» baǵdarlamasymen 40 adam baspanaly bolmaq
Abaı oblysy ákimdiginiń málimetinshe, ótken jyldyń jeltoqsan aıynan qolǵa alynǵan «Abaı jastary» baǵdarlamasy «Otbasy bank»AQ-men birlesip júzege asyrylýda. Baǵdarlamaǵa 18-35 jas aralyǵyndaǵy jastar qatysa alady. Onyń quramyna túrli salada eńbek etip júrgen jas mamandar men otbasylar kiredi.
«Búginde baǵdarlamanyń alǵashqy qorytyndysy anyqtaldy. Talap boıynsha eń kóp upaı jınaǵan 40 adam irikteldi. 2023 jyldyń 1 aqpanynan bastap olarǵa Semeı qalasy ákimdiginiń Turǵyn úı qatynastary jáne turǵyn úı ınspektsııa bólimi joldama beredi. Eger «Otbasy bank» AQ ótinish berýshiniń tólem qabiletin maquldamasa, kezekte turǵan kelesi adam ótinish qaldyra alady», - delingen aqparatta.
Aıta keteıik, baǵdarlamaǵa bir qatysýshyǵa beriletin nesıeniń eń joǵary somasy 15 mln teńgeni quraıdy. Eger turǵyn úı quny bul somadan assa, qalǵan aqshany ótinish berýshi óz qarajaty esebinen tóleıdi.
Páter satyp alý úshin bastapqy jarna – turǵyn úı qunynyń 10%-y. Paıyzdyq mólsherleme – 5%. Nesıeniń maksımaldy merzimi – 19 jyl.