«Abaı» jáne «Ál-Farabı» memlekettik syılyqtary taǵaıyndalady

NUR-SULTAN. QazAqparat – 2020 jyly alǵash ret «Abaı» jáne «Ál-Farabı» memlekettik syılyqtary tabys etiledi. Bul týraly búgin Abaıdyń 175 jáne Ál-Farabıdiń 1150 jyldyq mereıtoılaryn daıyndaý jáne ótkizý jónindegi memlekettik birikken komıssııa otyrysynda belgili boldy, dep habarlaıdy QazAqparat tilshisi.

Komıssııa otyrysynda jazýshy Rollan Seısenbaev «Abaı» jáne «Ál-Farabı» memlekettik syılyqtaryn taǵaıyndaýdy usynǵan edi.

«Abaı jyly bolǵandyqtan «Abaı» syılyǵyn berý kerek. Ol úlken, myqty syılyq bolsyn. Ǵalymdarǵa «Ál-Farabı» syılyǵyn berý qajet. Bul Abaı men Ál-Farabıǵa túkte qajet emes. Ol bizge kerek», - dedi jazýshy.

Osy oraıda, otyrysqa tóraǵalyq etip otyrǵan QR Memlekettik hatshysy Qyrymbek Kósherbaev Memleket basshysynyń tarapynan bul baǵytta arnaıy tapsyrmanyń bolǵanyn aıtty.

«Prezıdent Qasym-Jomart Toqaev bizge kelesi jyly mindetti túrde «Abaı» atyndaǵy jáne «Ál-Farabı» atyndaǵy memlekettik syılyqtar tapsyrý týraly tapsyrma berdi. Sizdiń oılaǵan oıyńyzdy Prezıdent bizge naqty tapsyrma retinde bergen. Sondyqtan bul másele ózi sheshimin taýyp otyr», - dedi Q.Kósherbaev.