Abaı týraly fılmder naqtylanýda - Aqtoty Raıymqulova
Búgin Parlament Májilisindegi Úkimet saǵatynan keıin tilshiler mınıstrden Abaı týraly kórkem fılmdi kim túsiretindigin surady.
«Ózderińiz bilesizder, Ulttyq kınony qoldaý ortalyǵynda osy kúnderi, ıaǵnı bir apta boıy ashyq baıqaý ótip jatyr. Bul baıqaýdyń nátıjesinde qandaı kórkem fılmder, qandaı derekti fılmder, sondaı-aq qaı nusqalar men jobalar qoldaý tapqanyn biletin bolamyz. Sonymen qatar, sarapshylyq komıssııa (27 aqpan men 6 naýryz aralyǵynda) qaraýynda úlken ári mańyzdy suraqtar qaralady», - dedi Aqtoty Raıymqulova.
Budan buryn habarlanǵandaı, Abaı týraly birneshe derekti fılm men teleserıal túsiriletini aıtylǵan edi. Bul týraly elordadaǵy Abaıdyń 175 jyldyq mereıtoıynyń resmı ashylýyna arnalǵan saltanatty sharada QR Mádenıet jáne sport mınıstri Aqtoty Raıymqulova málim etti.
Esterińizge salsaq, 2019 jyldyń naýryz aıynda Qazaqstan Táýelsizdik alǵaly osy salada qabyldanǵan alǵashqy zańnamalyq qujat - QR «Kınematografııa týraly» zańǵa sáıkes Ulttyq kınony qoldaý memlekettik ortalyǵy quryldy.
Bul uıymnyń qyzmetiniń negizgi baǵyty ulttyq kınony qoldaý, ony halyqaralyq deńgeıge kóterý jáne álemdik naryqqa shyǵarý, Qazaqstan kınoóndirisine ınvestıtsııa tartý. Atalǵan ortalyq arqyly ulttyq fılmderge, ulttyq fılm ataǵyn ıelenýge nıetti kınojobalarǵa memleket tarapynan qarjylaı qoldaý kórsetiledi, sonymen qatar kınematografııa salasynda sýbsıdııa beriledi.