Abaı shyǵarmalarynyń akademııalyq tolyq jınaǵy jaryqqa shyǵady
«Bıyl ınstıtýt óziniń 3 jyldyq jobalaryn aıaqtaıdy. 12 monografııanyń ishinde qazaq ádebıetiniń irgeli máselelerine, qazaq folkloryna, qazirgi qazaq ádebıetiniń damý órisine qatysty jańa eńbekter jaryq kóredi. Sonymen qosa bizdiń oqý ordasy Óner ınstıtýty atalǵandyqtan qazaq óneriniń ártúrli salalary boıynsha irgeli zertteýler jaryq kóredi. Qazaq mýzykasy, teatry, kınoóneri jáne beıneleý óneriniń máseleleri jóninde jańa eńbekter oqyrmanǵa jol tartady», - dedi Kenjehan Matyjanov Bilim jáne ǵylym mınıstrliginiń apparat jıynynda.
Instıtýt basshysynyń aıtýynsha, 2019 jyly «Dala folklory» antologııasynyń bes tomy shyqqan. Odan bólek, «Uly dalanyń kóne saryndary» antologııasynyń bir tomy, «Ejelgi dáýir ádebıeti» antologııasynyń bir tomy zamanǵa saı tsıfrlyq-elektrondy formatta oń myń danamen kitaphanalarǵa taratylǵan.
«Bul - buryn-sońdy mundaı formatta jaryq kórmegen jınaqtar. Ásirese munyń elektrondy jáne aýdıonusqasy qazirgi oqyrmandardy erekshe qyzyqtyryp otyr. Sonymen qatar bıyl Uly Abaıdyń 175 jyldyq mereıtoıyna tartý retinde aqyn shyǵarmalarynyń akademııalyq tolyq jınaǵy jaryq kóredi. Qazir baspada tur. Búgin-erteń qolymyzǵa tıedi dep eseptep otyrmyz. Bul – shırek ǵasyrdan keıin qaıtadan jaryq kórip otyrǵan eń tolyq jınaǵy sanalady. Ol - akademııalyq ǵylymı jınaq», - dedi ol.
Eske sala ketsek, osy otyrysta Bilim jáne ǵylym mınıstri Ashat Aımaǵambetov M.Áýezov atyndaǵy Ádebıet jáne óner ınstıtýtynyń barlyq jádigeri men qujatyn tsıfrlandyrýdy tapsyrǵan bolatyn.