Abaı shyǵarmalary tuńǵysh ret norveg tilinde usynyldy
Bul eńbek norveg tiline aýdarylǵan qazaq klassıkalyq ádebıetiniń alǵashqy úlgisi bolyp tabylady.
«Qazaqstan Prezıdenti Qasym-Jomart Toqaev, Abaı murasyna ultymyzdyń birligi men órkendeýine jol ashatyn qundy baılyq retinde júginýge shaqyrady. Biz Abaı shyǵarmalarynyń norveg tilinde jaryq kórýin Qazaqstan táýelsizdiginiń 30-jyldyǵyna arnaımyz», – dedi prezentatsııada Qazaqstannyń Norvegııadaǵy Elshisi Erkin Ahınjanov.
Abaı shyǵarmalaryn norveg tiline tájik-norveg jazýshysy jáne ádebıettanýshy Lıýtfııa Boboerova aýdardy. Kitapty «Sirkel Forlag» baspasy shyǵarǵan, bas redaktory jáne Abaı jaıly ómirbaıandyq taraý jazǵan norveg ǵalymy jáne baspageri Oshıld Kıýlos.
«Abaı dara qoǵamdyq synshy boldy, biraq ony birinshi kezekte ekzıstentsıaldyq máseleler tolǵantty. Abaıdyń «Qara sózderi» álemdik ádebı muranyń mańyzdy bóligi bolyp tabylady. Abaı shyǵarmalaryn norveg tiline aýdarý – Qazaqstandy Norvegııaǵa tanystyrýdyń biregeı múmkindigi. Buǵan qosa, bul jalpy adamzat tájirıbesine uly oıshyldyń kózqarastarymen bólisý múmkindigi de bolyp tabylady. Bizdiń baspa bul jobany joǵary baǵalaıdy», – dedi O. Kıýlos.
«Abaı Qunanbaıulynyń shyǵarmalary eshqashan eskirmeıdi, kerisinshe ýaqyt óte kele olarǵa suranys kúsheıe beredi. Olar qoǵamnyń kóne, túp-tamyry shabylmaǵan máselelerin naqty sýretteıdi, elge baǵyt baǵdar belgileıdi. Abaıdyń ósıet sózderin ár adam bilim, adamgershilik pen sypaıylyq sabaqtaryn ala alatyn ómir mektebi dep ataýǵa bolady. Abaı otbasy negizderine, bala tárbıeleýge, tilderdi oqý men ózge mádenıettermen tanysýǵa kóńil bóledi. Sonymen qatar, Abaı ádebıet bilgiri bolǵan. Ony shabyttandyrǵandardyń arasynda Fırdaýsı, Nızamı jáne Navoı sııaqty shyǵys klassıkterinen bastap orystyń kórkem sóz sheberleri – Lermontov, Tolstoı men Pýshkın, batystyń aqyndary – Gete men Geıne boldy. Ol 120-150 jyl buryn da, búgingi tańda da ózekti, ýaqyttan tys máseleler týraly jazǵan. Norvegııa oqyrmandary Abaı shyǵarmalarynan kóptegen paıdaly jáne ádemi taǵylymdar ala alatynyna senimdimin», – dep atap ótti L. Boboerova.
Norvegter álemdegi kitapty eń kóp oqıtyn halyqtardyń biri ekenin eskerip, aýdarmanyń joǵary sapasyn ǵana emes, sonymen qatar kitaptyń qalyń oqyrmanǵa qol jetimdiligin qamtamasyz etý mańyzdy boldy. Kitap 1500 danamen basylyp, Norvegııa kitaphanalarynda jáne kitap dúkenderinde, sondaı-aq tsıfrlik platformalarda taratyldy. Aýdıo nusqasy da jazylǵan. Basylym qazir Londondaǵy kitap kórmesinde de tanystyrylýda.