«Abaı» operasy Reseıdiń Úlken teatrynda sahnalanady

<p>ASTANA. KAZINFORM &mdash; Qazaqstan men Reseıdiń mádenıet mınıstrleri mádenı yntymaqtastyqtyń negizgi máselelerin talqylady. Birikken mádenıetterdiń X forýmy aıasynda QR Mádenıet jáne aqparat mınıstri Aıda Balaeva men Reseı Federatsııasy Mádenıet mınıstri Olga Lıýbımova kezdesti. Bul týraly QR Mádenıet jáne aqparat mınıstrliginiń baspasóz qyzmeti málim etti.&nbsp;</p>

Kezdesýdiń negizgi taqyryptarynyń biri – Uly Jeńistiń 80 jyldyǵyn merekeleýge daıyndyqqa qatysty kelisimderdi talqylaý boldy. Bul týraly Memleket basshysy úshinshi Ulttyq quryltaıda atap ótken bolatyn. Prezıdent daıyndyqty bastaýǵa tapsyrma berip, el qorǵaǵan erlerdiń esimin jańǵyrtý jáne tarıhı ádildikti qalpyna keltirý baǵytyndaǵy júıeli jumystyń mańyzdylyǵyn atap ótti. Mınıstrler osy baǵyttaǵy jumystardyń baǵdaryn aıqyndady.

Foto: QR Mádenıet jáne aqparat mınıstrliginiń baspasóz qyzmeti

Sonymen qatar taraptar eki eldiń teatr mekemeleri arasyndaǵy yntymaqtastyqty damytý, beıneleý óneri jáne anımatsııa salasyndaǵy baılanystardy arttyrý máselelerin talqylap, Qazaqstan men Reseı kórermenderiniń ulttyq kınoǵa degen qyzyǵýshylyǵy artyp kele jatqanyn atap ótti.

Foto: QR Mádenıet jáne aqparat mınıstrliginiń baspasóz qyzmeti

«Qazaqstan men Reseı arasyndaǵy mádenı yntymaqtastyq belsendi damyp keledi. Birlesken tabysty jobalar, gastrolder men halyqaralyq festıvalderge qatysý bizdiń ortaq jetistigimizdi dáleldeıdi. Biz teatr, mýzeı jáne mýzyka salasyndaǵy yntymaqtastyqty damytý úshin júıeli jospar qura otyryp, ózara baılanysty nyǵaıta beremiz», — dedi Aıda Balaeva.

Kezdesýge sondaı-aq Reseı Federatsııasy Prezıdentiniń halyqaralyq mádenı yntymaqtastyq jónindegi arnaıy ókili Mıhaıl Shvydkoı da qatysty. Ol aldaǵy mańyzdy oqıǵa — «Astana Opera» Qazaq ulttyq opera jáne balet teatrynyń Reseıdiń Úlken teatryndaǵy gastrolin atap ótip, onda «Abaı» operasy sahnalanatynyn tilge tıek etti.

Foto: QR Mádenıet jáne aqparat mınıstrliginiń baspasóz qyzmeti

Kezdesý sońynda teatr jáne mýzeı isin, kreatıvti ındýstrııalar men mýzykalyq bilim berýdi odan ári damytý josparlary talqylandy.