Abaı opera teatrynyń tsehy maska tigýdi qolǵa aldy

NUR-SULTAN. QazAqparat – Abaı atyndaǵy memlekettik akademııalyq opera jáne balet teatrynyń tsehy vırýstan qorǵanatyn maska tigip, qaıyrymdylyq retinde taratýdy qolǵa aldy, dep habarlaıdy QazAqparat.

«Teatr qaýymdastyǵy birneshe kúnnen beri kostıým tigý jumysyn keıinge qaldyryp, vırýstan qorǵaný maskalaryn ázirlep keledi. Bizdiń tigin tsehynyń sheberleri osyndaı qıyn kezeńde de shyǵarmashylyqqa basymdyq berýde. Bir rettik jáne birneshe ret qoldanýǵa bolatyn dızaınerlik maskalar jaqyn arada eriktilerge jiberiledi. Osylaısha, almatylyqtardy vırýstan qorǵaýǵa úles qosyp kele jatqandary úshin alǵys aıtamyz», - dep jazylǵan teatrdyń Feısbýktegi resmı paraqshasynda.

Sonymen birge, 29 naýryz kúni saǵat 12:00-de tikeleı efırde ártister teatr ómiri týraly «GATOB LIFE» jańa jobasyn usynady.

Jobany teatrdyń Youtube, Facebook, Instagram paraqshalarynan tamashalaýǵa bolady. Kórermendermen alǵashqy onlaın kezdesý «Korsar» baletine arnalmaq.

Eske sala ketsek, qazirgi ýaqytta koronavırýs ınfektsııasymen aýyrǵandar sany 135-ke jetti.

Olar:

Nur-Sultan qalasynda – 69

Almaty qalasynda – 48

Qaraǵandy qalasynda – 4

Shymkent qalasynda – 2

Aqmola oblysy – 1

Almaty oblysynda – 1

Aqtóbe oblysynda – 1

Atyraý oblysynda – 3

Jambyl oblysynda – 3

Pavlodar oblysynda – 1

Soltústik Qazaqstan oblysynda – 1

Mańǵystaý oblysy – 1.