Abaı óńirindegi órt: Almaty men Qaraǵandy oblystarynyń qutqarýshylary úılerine qaıtty

SEMEI. QazAqparat – Tótenshe jaǵdaılar mınıstri Syrym Sháriphanovtyń ókimi boıynsha Almaty jáne Qaraǵandy oblystary Tótenshe jaǵdaılar departamentteriniń kúshter men quraldar toptamalary turaqty jumys oryndaryna ketti. Bul týraly QazAqparat TJM resmı saıtyna silteme jasap habarlaıdy.

Syrym Sháriphanov órt sóndirýshilerge kórsetken erjúrektilik pen batyrlyq, joǵary kásibılikteri úshin alǵys bildirdi.

Tabıǵı órt ornynda odan ári qaraýyldaý jumysyn Ekologııa jáne tabıǵı resýrstar mınıstrliginiń orman órt stantsııalary, TJM órt sóndirý bólimsheleri jáne áýe kemeleri qamtamasyz etedi.

Órt ýchaskelerinde ashyq janý joq jáne eldi mekenderge qaýip joq.

Órt bastalǵaly beri 2 636 ret (kólemi – 7 747 tonna) sý tógilgen. Tolyq sóndirilgenge deıin oqshaýlanǵan órt oshaqtaryna turaqty túrde sý tógý, sondaı-aq jıekterin topyraqpen jabý jumystary júzege asyrylady.

Esterińizge sala keteıik, Abaı oblysyndaǵy «Semeı ormany» tabıǵı rezervaty aýmaǵyndaǵy tabıǵı órt oqshaýlandy.

Tótenshe jaǵdaılar birinshi vıtse-mınıstri Ibragım Kúlshimbaev órttiń aldaǵy 4-5 kúnde tolyqtaı sóndirilýi múmkin ekenin aıtty.