Abaı óleńderin oqý estafetasyna Tatarstan Prezıdenti qosyldy

QAZAN. Tatar-ınform – QazAqparat – Tatarstan prezıdenti Rýstam Mınnıhanov qazaq aqyny, uly Abaıdyń 175 jyldyǵyna arnalǵan estafetaǵa qatysty. Tatar basshysy aqynnyń óleńinen úzindi oqyǵan vıdeony Instagram-daǵy jeke paraqshasynda jarııalady, dep habarlaıdy QazAqparat Tatar-ınform saıtyna silteme jasap.

«Men dosym – Shyǵys Qazaqstan oblysynyń ákimi Danıal Kenjetaıuly Ahmetovten estafetany qýana qabyldadym jáne ony Qazaqstan Respýblıkasynda turatyn tatar dıasporasyna joldaımyn», – dedi Mınnıhanov.

Eske sala keteıik, 2020 jyly qazaqtyń uly aqyny, kompozıtor jáne aǵartýshy Abaıdyń týǵanyna 175 jyl tolady. Ol – qazaq jazba ádebıetiniń negizin salýshy jáne tuńǵysh klassık.

«Qunanbaevtyń mereıtoıyna oraı uıymdastyrylǵan fleshmob áleýmettik jelilerde qarqyn alýda. Qatysýshylar klassıktiń óleńderin oqyp, ánderin oryndaýda. Fleshmobqa Qazaqstan Prezıdenti Qasym-Jomart Toqaev, ánshi Dımash Qudaıbergenov, kompozıtor Igor Krýtoı da qosylǵan bolatyn», - dep jazady Tatar-ınform.

Aıta keteıik, QR Prezıdenti Qasym-Jomart Toqaev Abaı shyǵarmalarynan úzindi oryndaý estafetasyn 9 jasar mektep oqýshysynan qabyl alyp, ony Bilim jáne ǵylym mınıstri Ashat Aımaǵambetovke jáne jas ánshi Dımash Qudaıbergenge joldaǵan edi. Keıin Reseıdiń halyq ártisi Igor Krýtoı Dımash joldaǵan estafetany jalǵastyryp, aqyn óleńderin oqyǵan bolatyn.

Atalmysh estafetany «QazAqparat» halyqaralyq aqparat agenttiginiń ujymy «Egemen Qazaqstan» gazetinen qabyl alyp, Abaıdyń «Kózimniń qarasy» ánin shyrqady jáne chellendjdi Tatarstannyń «Tatar-Inform» aqparat agenttigine, Qyrǵyz Respýblıkasynyń «Kabar» ulttyq aqparat agenttigine, «Tengrinews» jáne NUR.KZ portaldaryna joldady.

Keıin «Tatar-ınform» ókilderi Abaıdyń óleńin oqyp, #abai175 fleshmobyn TNV – «ıAńa gasyr» teleradıokompanııasyna jáne «Bolgar radıosyna» tapsyrdy.