Abaı oblysynyń turǵyny Atyraýda 1,5 myń doza esirtkini zańsyz saqtaǵan

ATYRAÝ. QazAqparat – Atyraýda Abaı oblysynyń turǵyny 1,5 myń dana doza esirtki zańsyz saqtaý kúdigimen ustaldy, dep habarlaıdy QazAqparat tilshisi.

Atyraý oblystyq polıtsııa departamenti baspasóz qyzmetiniń málimetinshe, Abaı oblysynyń 25 jastaǵy turǵynynyń esirtkini zańsyz saqtap kelgeni anyqtalǵan.

«Esirtki qylmysyna qarsy is-qımyl basqarmasynyń qyzmetkerleri Atyraý qalasynda jedel-izdestirý sharalaryn júrgizip, sıntetıkalyq esirtkini saqtaǵan kúdiktini ustady. Kúdikti – Abaı oblysynyń 1998 jylǵy turǵyny. Odan salmaǵy 487,75 gramdyq 1 500 doza esirtki zaty tárkilendi. Medıtsınalyq saraptama qorytyndysymen esirtkiniń mefedron ekeni anyqtaldy», -dep habarlady departamenttiń baspasóz qyzmeti.

Qazir kúdiktige qatysty QR Qylmystyq kodeksiniń 296-babynyń 4-bóligimen sotqa deıingi tergep-tekserý bastaldy.

Ózge aqparat QR Qylmystyq-potsestik kodeksiniń 201-babyna sáıkes jarııalaýǵa jatpaıdy.

Eske sala ketelik, budan buryn Atyraýǵa ózge óńirden kelip esirtki satqan eki adam 7 jáne 10 jylǵa sottalǵanyn jazǵan edik.

Oblystyq polıtsııa departamentiniń baspasóz qyzmetinen málim etkendeı, esirtki satýshylar 2022 jyldyń 13 jeltoqsanynda ustalǵan.

Ózge oblystan kelgen 2002 jáne 2004 jylǵy turǵyndarynan polımerli pakettegi 19 «Ziplock» psıhotroptyq jáne ártúrli tústegi 18 flakondaǵy esirtki zattary tárkilendi. Medıtsınalyq saraptama qorytyndysymen 59,2891 gramm bolatyn mefedron jáne 339,0289 gramm «Alfa PVP» sıntetıkalyq esirtkisi ekeni dáleldendi.

Sot sheshimimen óz kinásin moıyndaǵan 2002 jylǵy jigit 10 jylǵa, al 2004 jylǵy boıjetken 7 jylǵa bas bostandyǵynan aıyryldy.