Abaı oblysynyń turǵyndary zańsyz saqtalǵan 65 qarýdy polıtsııaǵa tapsyrdy

SEMEI. QazAqparat – Abaı oblysynyń turǵyndary polıtsııaǵa 65 dana zańsyz saqtalǵan qarý tapsyrdy, dep habarlaıdy QazAqparat tilshisi óńirlik Polıtsııa departamentiniń baspasóz qyzmetine silteme jasap.

Abaı oblysynda qarýdy, oq-dárilerdi jáne jarylǵysh zattardy erikti túrde ótkizý aktsııasy 10 sáýirde bastalǵan. Onyń sheńberinde kez kelgen azamat ishki ister organdarynyń bólimshesine júginip, zańsyz saqtap kelgen qarý-jaraǵyn tapsyra alady. Ol úshin aqshalaı syıaqy qarastyrylǵan.

Sáýir aıynyń sońynda polıtsııaǵa oblys turǵyny kelip, satyp alǵan úıiniń jazǵy as bólmesinen qarýǵa uqsas zatty tapqanyn habarlaǵan. Polıtseılerge qarý tabylǵan jerdi kórsetip, óz erkimen tapsyrǵan. Tıisti saraptamalar jasalǵannan keıin áıelge aqshalaı tólem júrgizilgen.
«Aktsııa bastalǵannan qazirgi ýaqytqa deıin jalpy somasy 5 mıllıon teńgeden asatyn 65 birlik tirkelmegen qarý qabyldandy. Túri men sanatyna qaraı bir qarý birligi úshin tólem somasy – 10-nan 100 AEK-ke, ıaǵnı 34 500-den 345 000 myń teńgege deıin», - deıdi Abaı oblystyq PD Ákimshilik polıtsııa basqarmasynyń bastyǵy Rıfhat Taýfıkov.

FOTO: Abaı oblysy PD baspasóz qyzmeti