Abaı oblysynyń ortalyǵy bolatyn Semeıdiń ınfraqurylymy jaqsarady – qala ákimi

SEMEI. QazAqparat – Semeı qalasynyń ákimi Baqytjan Baıahmetov sanaýly kúnderden keıin qurylatyn Abaı oblysynyń ortalyǵy bolatyn shahardyń ınfraqurylymy jaqsara túsetinin aıtty. Alǵashqy kezektegi máseleniń biri – jol jóndeý jumystary, dep habarlaıdy QazAqparat tilshisi.

Qala ákimdiginiń málimetine súıensek, búginde Semeıde jol jóndeý jumystary qarqyndy júrgizilip jatyr. Bıyl 60-tan astam kóshe joly ortasha jóndeýden ótedi dep josparlanǵan.

«Prezıdent Qasym-Jomart Toqaevtyń sheshimimen Abaı oblysynyń qurylatyndyǵy belgili. Bul qala ınfraqurylymynyń jaqsara túsýine jol ashady. Onyń ishinde joldardyń sapasyn arttyrý – basty maqsattardyń biri. Sátbaev kóshesi – Semeıdegi negizgi kóshelerdiń biri. Bul uzyn kóshe birneshe aýdandy biriktiredi. Sátbaev kóshesi arqyly «Omby-Maıqapshaǵaı» tasjolymen bizge kórshiles elderden kelýshiler kóp. 25 mamyrdan bastap merdiger uıym osy jáne 2-shi Zagorodnıaıa kóshesinen Omby-Maıqapshaǵaı tasjolyna deıingi aralyqta jóndeý jumystaryn bastady», - dedi Baqytjan Baıahmetov.

Aıtýynsha, bul jumystarǵa 45 adam men 20 tehnıka jumyldyrylǵan. Barlyq jumystar osy jyldyń maýsym aıynyń sońynda aıaqtalady dep josparlanǵan.

Eske salsaq, Úkimet Abaı, Jetisý jáne Ulytaý oblystaryn qurý jónindegi is-sharalar josparyn bekitti.