Abaı oblysynyń halqyna jylytý maýsymynda 570 myń tonnaǵa jýyq kómir qajet
Oblys ákimdiginiń málimetine súıensek, jylytý maýsymynda óńirge 1,245 mln tonna kómir jetkizilýi tıis. Onyń ishinde turǵyndarǵa – 567,9 myń tonna, ortalyqtandyrylǵan jylý kózderine – 595,4 myń tonna, bıýdjettik uıymdarǵa 84,5 myń tonna kerek.
Abaı oblysynyń kommýnaldyq sektoryn kómirmen ýaqytyly qamtamasyz etý úshin «Qarajyra» jáne «QTJ» AQ-men birlesip, shahtadan kómirdi ýaqytyly jetkizý úshin vagondardyń kestesi ázirlendi. Búgingi tańda temirjol tuıyqtarynda 13,3 myń tonna kómir bar. Onyń ishinde Semeıde – 9 myń tonna, Aıagóz aýdanynda – 3,4 myń tonna, Jarma aýdanynda – 200 tonna, Borodýlıha aýdanynda – 660 tonna.
«Turǵyndardy jylý berý maýsymy bastalǵanǵa deıin kómir satyp alýǵa shaqyramyz. Sebebi kún sýyta salysymen kezek kóbeıip, úlken suranysqa baılanysty kómir baǵasy kóterilip ketýi múmkin. Budan bólek, kómirdiń baǵasy báskelestik, ıaǵnı naryqtaǵy suranysqa qaraı belgilenedi. Qatty otynnyń baǵasyn osy saladaǵy ýákiletti organ baqylaıdy», - deıdi Abaı oblysynyń Energetıka jáne TKSh basqarmasynyń bólim basshysy Altynbek Ádilbekov.
Qazir aımaqta kómirge degen úlken suranys jáne uzyn-sonar kezek joq. Temirjol tuıyqtarynda kómir josparǵa sáıkes ýaqytyly jetkizilip jatyr.