Abaı oblysynyń áleýmettik-ekonomıkalyq damýy baǵytynda 46 joba iske asyryla bastady

SEMEI. QazAqparat – Bıyl Abaı oblysynyń bıýdjeti 374 mlrd teńgege jetti, bul – ótken jylmen salystyrǵanda 46 paıyzǵa artyq. Bul týraly Semeıde ótken óńirdiń áleýmettik-ekonomıkalyq damý máseleleri jónindegi keńeıtilgen keńeste aıtyldy.

«Byltyrǵy jyldyń qorytyndysy boıynsha negizgi kapıtalǵa ınvestıtsııa tartý kólemi 420 mlrd teńge boldy, al aýyl sharýashylyǵy taýarlaryn óndirý kólemi 473 mlrd teńgeden asty. 340 myńnan astam sharshy metr úıdi paıdalanýǵa berýdiń nátıjesinde 3 myńnan astam otbasy turǵyn úımen qamtamasyz etildi. Semeı qalasynyń bıýjeti ótken jylmen salystyrǵanda 50 paıyzǵa ósip, 86 mlrd teńgege jetti. Memleket basshysynyń tikeleı tapsyrmasymen oblysty áleýmettik-ekonomıkalyq damytýdyń keshendi jospary daıyndalyp, Úkimet qaýlysymen bekitildi. Mańyzdy qujat 1,9 trln teńge bolatyn 102 is-sharany qamtıdy», - dedi oblys ákimi Nurlan Uranhaev.

Keshendi jospar boıynsha bıyl óńirde 89,2 mlrd teńgege 46 jobany iske asyrý bastalyp ketken.

«Búgingi tańda 46 is-sharanyń ekeýi oryndaldy (2,9 mlrd teńge), qalǵandary oryndalý barysynda. Birinshisi – Kókpekti aýdanynda «Elimaı» jaýapkershiligi shekteýli seriktestigi 1,5 myń ga alańda sýarý júıelerin iske qosty. Ekinshi – Úrjar aýdanynda «Muhit Agro» jaýapkershiligi shekteýli seriktestigi turaqty sýarý ýchaskesine ınfraqurylym tartty. Keshendi jospardy iske asyrý nátıjesinde 2028 jylǵa qaraı jalpy aımaqtyq ónim kólemi 3,2 trln teńgege jetedi, ónerkásip óniminiń kólemi 1,8 esege ulǵaıyp, 2,2 trln teńge bolady», - dedi oblys ákiminiń birinshi orynbasary Aıdyn Kárimov.

Jańa oqý jylynan bastap oblystyń bastaýysh synyp oqýshylary tegin tamaqtanady. 350 balabaqshadaǵy kópbalaly otbasylardyń 5 700 balasyna osyndaı múmkindik beriledi. Osy sanattaǵy balalar qosymsha bilim berý uıymdary, úıirme, sektsııalarǵa tegin barady. 600 jetim jáne ata-ana qamqorlyǵynsyz qalǵan balalardyń qamqorshylaryna járdemaqy tóleýge 200 mln teńge qarastyrylǵan. Oqýshy ornynyń tapshylyǵyn sheshý maqsatynda 2027 jylǵa deıin oblysta 9 500 oryndyq 18 mektep salynady. Atap aıtqanda, Semeıde 5 mektep salý josparlanǵan.

«Mektepterdiń materıaldyq-tehnıkalyq bazasyn nyǵaıtý maqsatynda 87 jańa kabınet jabdyqtalady. Sondaı-aq, 11 aýyldyń mektebine avtobýs satyp alynady. Bıyl 8 mektep pen 1 balabaqshaǵa kúrdeli jóndeý, 85 mektepke aǵymdaǵy jóndeý júrgiziledi», - dedi oblys ákiminiń orynbasary Shalqar Baıbekov.